Աշխատանքային գրքույկները Հայաստանում հունվարի 1-ից դուրս կգան շրջանառությունից
ԵՐԵՎԱՆ, 18 օգոստոսի. /ԱՌԿԱ/. Հայաստանում 2017 թվականի հունվարի 1-ից աշխատանքային գրքույկները դուրս կգան շրջանառությունից: Համապատասխան որոշումը կայացվել է հինգշաբթի ՀՀ կառավարական նիստի ժամանակ:
Ինչպես նշեց ՀՀ աշխատանքի և սոցիալական հարցերի նախարար Արտեմ Ասատրյանը, գործատուների մոտ գտնվող աշխատանքային գրքույկները կփոխանցվեն լիազոր մարմին, որը բոլոր տվյալները կմուտքագրի տվյալների համապատասխան շտեմարան: Ապա, նախարարի խոսքով, աշխատանքային գրքույկները կվերադարձվեն սեփականատերերին։
«Այս աշխատանքները կկատարվեն երկու տարվա ընթացքում: Արդյունքում, տվյալների շտեմարանում կհայտնվի քաղաքացիների աշխատանքային փորձի մասին ողջ տեղեկատվությունը, ինչն իր հերթին կբարձրացնի կենսաթոշակային համակարգի կառավարելիության մակարդակը», - ավելացրեց Ասատրյանը: -0-
