Հայաստանի տնտեսության «ստվերի» մակարդակը հասնում է 20%–ի․ ՊԵԿ նախագահ

ԵՐԵՎԱՆ, 23 մայիսի․/ԱՌԿԱ/․ ՀՀ պետական ​​եկամուտների կոմիտեի նախագահ Էդուարդ Հակոբյանը տնտեսությունում «ստվերի» մակարդակը գնահատել է 20%։

 ««Ստվերային» տնտեսության տարբեր գնահատականներ կան։ Օրինակ՝ 5-7 տարի առաջ «ստվերային» տնտեսության ծավալը հասնում էր 35-40%-ի։ Վիճակագրական կոմիտեն վերջին անգամ «ստվերի» չափը գնահատել է 2022 թ․–ին 22%։ Հիմա, տարբեր փորձագետների գնահատականներով, խոսքը 20%-ի մասին է», - ասաց Հակոբյանը մամուլի ասուլիսի ժամանակ։

Նրա խոսքով՝ մեծ նշանակություն ունի հարկային բացը, այսինքն՝ տարբերությունը հավաքագրված հարկերի և այն հարկերի միջև, որոբք կարող էին հավաքագրվել։

«Ներկայումս Պետական ​​եկամուտների կոմիտեն և Ֆինանսների նախարարությունը «ստվերային» եկամուտը գնահատում են 200-300 միլիարդ դրամ։ Մի քանի տարի առաջ այս ցուցանիշները 2-3 անգամ ավելի բարձր էին», - ասաց Հակոբյանը՝ հավելելով, որ չափազանց դժվար է հաշվարկել գյուղատնտեսության և ոսկերչական արդյունաբերության «ստվերային» եկամուտների ծավալը։

Պետական ​​եկամուտների կոմիտեի տվյալներով՝ 2025 թվականի հունվար-ապրիլին Հայաստանում հայտնաբերվել է 84 միլիարդ դրամի «ստվերային» շրջանառություն, որը 146%-ով ավելի է 2024 թվականի նույն ժամանակահատվածի համեմատ։ Միաժամանակ, հունվար-ապրիլ ամիսների հարկային եկամուտները, նախորդ տարվա նույն ժամանակահատվածի համեմատ, աճել են 14.5%-ով կամ 120 միլիարդ դրամով։