Հայկական ընկերությունները արևմտյան կազմակերպությունների հետ աշխատանքի փորձի պակաս ունեն. հոլանդացի փորձագետ

ԵՐԵՎԱՆ, 1 նոյեմբերի. /ԱՌԿԱ/. Հայկական ընկերությունները արևմտյան կազմակերպությունների հետ աշխատանքի փորձի պակաս ունեն, հինգշաբթի լրագրողներին ասաց «Մասնավոր հատվածի ներդրումային ծրագիր» (Private Sector Investment - PSI) ներդրումային դրամաշնորհային կազմակերպության խորհրդատու Արկո Ֆան Վեսելը` Երևանում ծրագրի շնորհանդեսի ժամանակ։ 

«Դեռևս ոչ շատ հայկական ընկերություններ արևմտյան ընկերությունների հետ բիզնես վարելու փորձ ունեն, սակայն ես կարծում եմ, որ դա մեծ խնդիր չէ, և դա կարելի է շատ շուտ սովորեցնել»,- ասաց նա։

Ըստ Վեսելի` PSI ծրագիրը, որի շրջանակներում նախատեսվում է հայ-հոլանդական համատեղ ձեռնարկություններ ֆինանսավորել, կարող է օժանդակել փորձի ձեռք բերմանը և միաժամանակ հանրապետությունում ներդրումային միջավայրի բարելավմանը` դրանով խթանելով Հայաստանի տնտեսության զարգացումը։

Նա տեղեկացրեց, որ ծրագիրն ընդգրկում է տնտեսության տարբեր ոլորտներ, մասնավորապես, գյուղատնտեսությունում, արդյունաբերությունում, ինչպես նաև ծառայությունների ոլորտում։

«Դրամաշնորհի չափը չպետք է գերազանցի 1,5 մլն եվրոն, որի 50%-ը կծածկվի ծրագրի շրջանակներում, իսկ մյուս մասը` նախագծի գործընկերների կողմից», - նշեց նա։   

Միաժամանակ Վեսելը նշեց, որ PSI ծրագիրը Հայաստանում գործում է արդեն 10 տարի, սակայն չնայած դրան` հայկական մասնավոր կազմակերպությունները դեռևս չեն շտապում օգտվել դրանից։

«Գուցե խնդիրը իրազեկվածության ցածր մակարդակն է։ Այդ պատճառով մենք կազմակերպեցինք այսօրվա միջոցառումը, որպեսզի պատշաճ կերպով հայկական կազմակերպություններին ներկայացնենք մեր ծրագրերը», - ասաց Վասելը։

Նա հայտնեց նաև, որ PSI ծրագիրը իրականացվում է աշխարհի 50 երկրներում, այդ թվում` Վրաստանում և Մոլդովայում։

Զարգացման հայկական գործակալության ներդրումների խթանման դեպարտամենտի տնօրեն Նատալյա Արծրունին իր հերթին նշեց, որ ծրագրերի ֆինանսավորման ժամանակ հիմնական նախապատվությունը տրվում է նորարարական ծրագրերին։

Նա հայտնեց նաև, որ PSI ծրագրի շրջանակներում Հայաստանում արդեն երեք ծրագիր է իրականացվում` երկուսը գյուղատնտեսության և  մեկը` բժշկության ոլորտներում։

«Մասնավոր հատվածի ներդրումային ծրագիր» դրամաշնորհային ծրագիրն իրականացվում է Նիդեռլանդների արտաքին գործերի և համագործակցության զարգացման նախարարության կողմից և աջակցում է զարգացող շուկաների նորարարական ներդումային նախագծերին։--0--