ՀՀ էկոնոմիկայի նախարարությունը հերքել է ծաղիկների՝ ՌԴ վերաարտահանման մասին լուրերը
ԵՐԵՎԱՆ, 21 հուլիսի․/ԱՌԿԱ/․ ՀՀ էկոնոմիկայի նախարարությունը հերքել է տարածվող լուրերն այն մասին, որ ծաղիկներ արտահանողները ծաղիկներ են ներմուծում այլ երկրներից Հայաստան, ապա վերաարտահանում դրանք Ռուսաստան։
Վերջին շրջանում Ռուսաստանը սահմանափակել է Հայաստանից ծաղիկների ներմուծումը։ ՌԴ-ի կիրառած սահմանափակումները դժգոհություն են առաջացրել ծաղիկների արտահանմամբ զբաղվող տնտեսվարողների մոտ, որոնք բողոքի ակցիաներ են անցկացնում՝ պահանջելով խնդրին լուծում տալ։
«Արմենպրես»-ի հարցմանն ի պատասխան՝ ՀՀ էկոնոմիկայի նախարարությունը նշել է, որ դրսից ծաղիկների ներմուծման ծավալն աննշան է ՀՀ-ից Ռուսաստան արտահանման ծավալի համեմատ, ինչպես նաև նշել է, որ հիմնականում ներմուծվում են սածիլներ։
«Կառավարության շենքի մոտ բողոքի ակցիա իրականացնող ցուցացար/ծաղկավաճառը ևս միայն ծաղիկների ներկրված սածիլների մասին է խոսել, ինչը թյուրըմբռնման տեղիք է տվել։ Ներկրված սածիլներից Հայաստանում արտադրվում են ծաղիկներ և արդեն ծաղկի տեսքով արտադրանքը արտահանվում է»,-ընդգծում են գերատեսչությունից։
Գերատեսչությունը, որպես ապացույց, ներկայացնում է մեկ ցուցանիշ։
«Միայն 2025 թվականի հունվարի 1–ից մինչև հուլիսի 20-ը ՀՀ-ից ՌԴ է արտահանվել ավելի քան 38 միլիոն հատ ծաղիկ, իսկ տարբեր երկրներից ներմուծված կտրված ծաղիկների թիվը կազմում է մոտ 300 հազար հատ։ Այսինքն` չնչին տոկոսը, որը որևէ առնչություն չունի ՌԴ արտահանվող ծաղիկների հետ»,-ասվում է Էկոնոմիկայի նախարարության պարզաբանման տեքստում։
