ՀՀ էկոնոմիկայի նախարարության բյուջետային ծախսերը 2012թ.–ին կազմել են շուրջ 2,6 մլրդ դրամ

ԵՐԵՎԱՆ, 5 հունիսի. /ԱՌԿԱ/. ՀՀ էկոնոմիկայի նախարարության բյուջետային ծախսերը 2012թ.–ին կազմել են շուրջ 2,6 մլրդ դրամ` ապահովելով կատարման 79,2 տոկոսը, չորեքշաբթի խորհրդարանում 2012թ.–ի բյուջեի կատարման մասին հաշվետվության ընթացքում տեղեկացրեց ՀՀ ֆինանսների առաջին փոխնախարար, գլխավոր գանձապահ Ատոմ Ջանջուղազյանը։ Մասնավորապես` 150 մլն դրամ է ուղղվել փոքր և միջին ձեռնարկատիրության աջակցմանը, ավելի քան 160 մլն դրամ` Գյումրիի տեխնոպարկի ծրագրի իրականացմանը։ Գլխավոր գանձապահը տեղեկացրեց նաև, որ Էկոնոմիկայի նախարարության պահպանման ծախսերը կազմել են շուրջ 607,5 մլն դրամ (կատարումը կազմել է 99,2%)։ Ըստ նրա` Էկոնոմիկայի նախարարության աշխատակազմի ծախսերը կազմել են 67,4 մլն դրամ (կատարումը` 87,42%)։ Ջանջուղազյանը նշեց, որ գերատեսչության աշխատակազմի ծախսերը կրճատվել են միջոցների տնտեսման շնորհիվ։ Ճշտված ծրագրի համաձայն` 2012թ.–ի պետբյուջեի եկամուտները կազմել են 944, 914 մլրդ դրամ, իսկ փաստացի եկամուտները, հաշվի առնելով արտաբյուջետային միջոցները, 946,193 մլրդ դրամ (ճշտված ծրագրի 101,1%)։ Փաստացի ծախսերը, ներառյալ փաստացի արտաբյուջետային ծախսերի 23,696 մլրդ դրամը, 2012թ.–ին կազմել են 1,006 տրլն դրամ կամ պետբյուջեի ճշտված ծրագրի 93,4 տոկոսը։ Հայաստանի պետբյուջեի պակասուրդը 2012թ.–ին կազմել է 59,9 մլրդ դրամ կամ պետբյուջեի ճշտված ծրագրի կողից նախատեսված ցուցանիշի 45,3 տոկոսը։ –0–