ԿԲ նախագահ. առաջին եռամսյակում ՀՀ-ում գրանցվել է բանկային խարդախության ավելի քան 400 դեպք
ԵՐԵՎԱՆ, 11 հունիսի․/ԱՌԿԱ/. Այս տարվա առաջին եռամսյակում Հայաստանի բանկային համակարգում գրանցվել է խարդախության 408 դեպք, դրանց թիվը նվազում է, ասել է Հանրապետության Կենտրոնական բանկի նախագահ Մարտին Գալստյանը՝ բացատրելով, որ այս թիվը կարող է ճշգրիտ չլինել, քանի որ որոշ դեպքերի վերաբերյալ իրավապահ մարմինները դեռևս դիմումներ չեն ստացել։
«Մեր աջակցությամբ և հորդորով բանկերը որոշակի միջոցներ են ձեռնարկել՝ թվային տիրույթում խարդախությունները կանխարգելելու նպատակով», - ասել է նա երեքշաբթի մամուլի ասուլիսում՝ պատասխանելով «ԱՌԿԱ» գործակալության հարցին։
Գալստյանը նշել է, որ կարգավորող մարմինը փորձել է ուսումնասիրել բոլոր դեպքերը, որից հետո տեղեկատվությունն ամփոփվել է։
«Երբ անալոգային տնտեսությունից անցում ես կատարում թվային տնտեսության, ապա համապատասխանաբար փոփոխվում են դրամական միջոցների՝ ապահով վայրում պահպանելու «արգելափակման» մեխանիզմները՝ դառնալով թվային։ Այդ դեպքում մարդիկ պետք է ուշադիր լինեն թվային տիրույթում առկա իրենց միջոցների հանդեպ և ոչ մի դեպքում իրենց «զինանոցի դռները» չբացեն անհայտ անձանց առջև։ Բայց եթե այնուամենայնիվ, քաղաքացին տուժել է, ապա վերլուծվում է տվյալ իրավիճակը. եթե հայտնաբերվեր կամ ենթադրվեր, որ բանկը մեղավոր է (օրինակ՝ եթե կոնտակտային կենտրոնի աշխատակիցը չի արձագանքել երեք ժամվա ընթացքում կամ դա ինտերֆեյսի ձևավորման սխալ էր, որից օգտվել էր խարդախը), բանկը անմիջապես կվերադարձնի գումարը զոհերին առանց քննարկման», - նշեց նա։
Խարդախության տեսակների մասին խոսելով՝ ԿԲ ղեկավարը նշեց, որ խարդախները, խաբեության կամ ֆիշինգի միջոցով, հասանելություն են ստացել տվյալներին և մեկ այլ անձի անունից վարկեր են տրամադրել կամ տիրացել բանկային հաշվին եղած միջոցներին։ «Այժմ ի հայտ է եկել խարդախության նոր տեսակ. օրինակ՝ նրանք զանգահարում են ձեզ և ներկայանում որպես բջջային օպերատորի կամ ծառայություն մատուցողի աշխատակիցներ, ասում են. «Մենք ուզում ենք բարելավել ձեր 5G ցանցը, արագացնել ձեր ինտերնետը, դուք այժմ հաղորդագրություն կստանաք ձեր հեռախոսին, խնդրում ենք հետևել հղմանը»։ Դուք սեղմում եք, նրանք ստանում են կոդ, մուտք են գործում ձեր բանկային հավելվածներ, և այստեղ ոչ ոք չի կարող ոչինչ կանխարգելել», - ասաց նա։
«Խնդիրն այն է, որ չպետք է վստահության կորուստ ունենանք համակարգում,-ընդգծեց Գալստյանը և ամփոփելով ավելացրեց. «Ամենամեծ խնդիրն այն է, որ մարդիկ դառնում են խաբեության զոհ, հնարավորություն տալիս զեղծարարներին մուտք գործել իրենց սարքեր»։
Հաշիվներից գումարների հափշտակման դեպքերին անդրադառնալով՝ Գալստյանը նշեց, որ իրավիճակն այստեղ առավել բարդ է։
«Այս պահին ընթանում են քննարկումներ, և չի բացառվում, որ մոտ ժամանակներում կհասնենք համաձայնության»,-ասել է նա։
