Հայաստանում ԵԱԶԲ–ի ներդրումները 2025–2026թթ․–ին նախատեսված են 200–250մլն դոլարի սահմանում․ փոխնախագահ
ԱԼՄԱԹԻ (Ղազախստան), 5 դեկտեմբերի․/ԱՌԿԱ/․ Եվրասիական զարգացման բանկը (ԵԱԶԲ) նախատեսում է Հայաստանում կատարել 200–250մլն դոլարի ներդրում 2025–2026թթ․–ին։ Այս մասին, պատասխանելով «ԱՌԿԱ» գործակալության հարցին, հայտարարեց ԵԱԶԲ վարչության նախագահի տեղակալ Յարոսլավ Մանդրոնը։
«2025թ․–ին կկողմնորոշվենք «Հայաստանի էլեկտրական ցանցերի» հարցով», – հայտարարեց Մանդրոնն՝ ավելացնելով, որ բանկը կենտրոնանում է Հայաստանի էներգետիկ ոլորտի, գյուղատնտեսության և լեռնահանքային արդյունաբերության վրա։ Դիտարկվում է նաև համագործակցության շարունակության հնարավորությունը «Երեմյան Փրոջեքթս» ագրոարդյունաբերական համալիրի հետ։
Մանդրոնն ընդգծեց, որ Հայաստանում ԵԱԶԲ-ն շեշտը դնում է իրական հատվածում ներդրումների և ինտեգրման վրա։
«ՀՀ–ու ԵԱԶԲ–ի գումարային ներդրումները 2022–24թթ․–ին կազմել են 328մլն դոլար, իսկ կուտակած ներդրումները՝ 448մլն դոլար։ Հայաստանում ԵԱԶԲ–ի ընթացիկ ներդրումային պորտֆելը կազմում է 200մլն դոլար», – ասաց Մանդրոնը 2024թ․–ի ամփոփիչ ասուլիսի ժամանակ։
Նրա խոսքով, 2024–2025թթ․–ին Զանգեզուրի պղնձամոլիբդենային կոմբինատի արդիականացման և արտադրության մեջ ներդրվել է 100մլն դոլար, Ozon ԸԽ–ին բանկային երաշխիքներ տրամադրելու մեջ՝ 39մլն դոլար, «Երեմյան Փրոջեքթս» ԸԽ–ի կաթնամթերքի ֆերմաների կառուցման և արդիականացման մեջ՝ 6մլն դոլար։
Եվրասիական զարգացման բանկը (ԵԱԶԲ), Պարենի համաշխարհային ծրագիրը (World Food Programme) և «Երեմյան Փրոջեքթս» ընկերությունների խումբը Հայաստանի Հանրապետությունում իրականացնում են «Կաթ դպրոցներում» ծրագիրը։
ԵԱԶԲ–ի մասին
Եվրասիական զարգացման բանկը (ԵԱԶԲ) միջազգային ֆինանսական կազմակերպություն է, որը ներդրումային գործունեություն է իրականացնում եվրասիական տարածքում։ Ավելի քան 17 տարի ԵԱԶԲ-ն նպաստում է մասնակից երկրների միջև տնտեսական կապերի ամրապնդմանը և ընդլայնմանն ու համակողմանի զարգացմանը։
ԵԱԶԲ-ի կանոնադրական կապիտալը կազմում է 7 մլրդ դոլար: ԵԱԶԲ պորտֆելում հիմնական մասնաբաժինը զբաղեցնում են ինտեգրացիոն էֆեկտ ունեցող նախագծերը տրանսպորտային ենթակառուցվածքների, թվային համակարգերի, կանաչ էներգետիկայի, գյուղատնտեսության, արդյունաբերության և մեքենաշինության ոլորտներում: Բանկն իր գործունեության ընթացքում առաջնորդվում է ՄԱԿ-ի Կայուն զարգացման նպատակներով և ESG սկզբունքներով:
