Рейтинг@Mail.ru
USD
360.54
EUR
398.4
RUB
4.3927
GEL
138.94
2026 թ. նոյեմբերի 13, ուրբաթ
եղանակը
Երևանում
+4

Հայաստանը կշարունակի համագործակցությունը ԵԱՏՄ-ի հետ՝ ձգտելով վերացնել արտահանման խոչընդոտները. Փաշինյան

02.10.2026, 18:48
Հայաստանը բազմիցս վերահաստատել է ԵԱՏՄ շրջանակում փոխշահավետ համագործակցության շարունակականությանն ուղղված իր հանձնառությունը, հայտարարել է ՀՀ վարչապետ Նիկոլ Փաշինյանը
Հայաստանը կշարունակի համագործակցությունը ԵԱՏՄ-ի հետ՝ ձգտելով վերացնել արտահանման խոչընդոտները. Փաշինյան

ԵՐԵՎԱՆ, 2 հոկտեմբերի․ /ԱՌԿԱ/․ Հայաստանը բազմիցս վերահաստատել է ԵԱՏՄ շրջանակում փոխշահավետ համագործակցության շարունակականությանն ուղղված իր հանձնառությունը, հայտարարել է ՀՀ վարչապետ Նիկոլ Փաշինյանը։

«Այն նպատակաուղղված է տնտեսական կայունության ամրապնդմանը և մեծ տարածաշրջանի կայուն զարգացման ապահովմանը։ Վստահ եմ, որ այսօրվա նիստը ևս մեկ հնարավորություն կընձեռի արդիական հարցերի շուրջ մտքերի բաց և կառուցողական փոխանակման համար», - ասել է Փաշինյանը Եվրասիական միջկառավարական խորհրդի հերթական նիստին հեռավար կարգով իր ելույթում։

«Խաղաղության խաչմերուկ»-ի և TRIPP-ի մասին

Վարչապետը նշել է, որ Հայաստանը հետևողականորեն առաջ է մղում տարածաշրջանում խաղաղության և առևտրատրանսպորտային փոխկապակցվածության օրակարգը։

«Ինչպես բազմիցս նշվել է, «Խաղաղության խաչմերուկ» հայկական նախաձեռնությունն ուղղված է տրանսպորտային, էներգետիկ և թվային փոխկապակցվածության զարգացման միջոցով նոր հնարավորությունների ստեղծմանը։ «Խաղաղության խաչմերուկի» առանցքային բաղադրիչներից մեկը TRIPP-ն է։

TRIPP նախագիծը Հայաստանի և Ադրբեջանի միջև ուղիղ երկաթուղային հաղորդակցություն կհաստատի։

Միևնույն ժամանակ, նախագիծը հնարավորություն կտա ինտեգրել Հայաստանը միջազգային երկաթուղային ցանցին և հնարավորություն կստեղծի Պարսից ծոցի և Սև ծովի միջև երկաթուղային հաղորդակցություն ձևավորելու համար», - ասել է Փաշինյանը։

Վարչապետը նշել է, որ սա տրանսպորտային կապերի ոլորտում նշանակալի իրադարձություն կդառնա՝ փոփոխություններ բերելով Հայաստանի, Ադրբեջանի, Վրաստանի և Իրանի համար։

«Նեղ կազմով նիստի ընթացքում ես գործընկերներին տեղեկացրեցի որոշ ասպեկտների մասին, որոնք վերաբերում են տարածաշրջանային տրանսպորտային ենթակառուցվածքների ապաշրջափակմանը, որը տեղի է ունենում Հայաստանի և Ադրբեջանի միջև խաղաղության հաստատման արդյունքում», - ընդգծել է Փաշինյանը։

Նա հույս է հայտնել, որ որոշակի լուծումների, որոնք, մասնավորապես, կհանգեցնեն Հայաստանի Հանրապետության երկաթուղիների արդյունավետության բարձրացմանը։

Հայկական արտադրանքի արտահանման սահմանափակումների մասին

Վարչապետը նշել է, որ ցավոք, Չոլպոն-Աթայում Միջկառավարական խորհրդի նիստին իմ նախորդ մասնակցությունից ի վեր առկա մի շարք հարցերի ուղղությամբ էական առաջընթաց արձանագրել չի հաջողվել։

«Մասնավորապես, պահպանվում են սահմանափակումներ և վարչական խոչընդոտներ, որոնք շարունակում են էապես դժվարացնել միասնական շուկայի լիարժեք և արդյունավետ գործունեությունը։

Այս կապակցությամբ կարևոր ենք համարում ԵԱՏՄ իրավունքին համապատասխան Հայաստանի արտադրանքի արտահանման և տարանցման առկա խոչընդոտների վերացման ուղղությամբ կառուցողական երկխոսության շարունակումը», - եզրափակել է Փաշինյանը։

Նա վստահություն է հայտնել, որ այս ուղղությամբ հետևողական առաջընթացը բխում է ԵԱՏՄ բոլոր անդամ պետությունների շահերից՝ ապահովելով առևտրային հոսքերի կայունությունը, շուկայի մասնակիցների համար պայմանների կանխատեսելիությունը, ինչպես նաև ինտեգրացիոն համագործակցության հետագա ամրապնդումը։