Դեպարդյեն ներդրումային ընկերություն է բացել Բելգիայում

ԵՐԵՎԱՆ, 14 մարտի. /ԱՌԿԱ/. Ֆրանսիացի դերասան Ժերար Դեպարդյեն Holding 2712 ներդրումային ընկերություն է բացել` գրանցելով այն Բելգիայում։ Ընկերությունը տեղակայված է Էստեմփյուի քաղաքում` Ֆրանսիայի սահմանից ոչ հեռու, հաղորդում է Reuters–ը։

Ընկերության անվանումը կապված է դերասանի ծննդյան ամսաթվի հետ` 1948թ.–ի դեկտեմբերի 27։ Նշենք, որ Էստեմփյուին տեղակայված է Նեշեն գյուղի մոտ, որտեղ Դեպարդյեն վերջերս տուն է գնել։ Այդ գյուղում բնակվում է մոտ  2,8 հազար ֆրանսիացի, այդ թվում` Մյուլեի ընտանիքը, որն այնպիսի խոշորագույն ընկերություններ ունի, ինչպիսին է Auchan հիպերմարկետների ցանցը և Decathlon սպորտային խանութների ցանցը։

Հիշեցնենք, որ Դեպարդյեն լքել է Ֆրանսիան. նրա դժգոհության համար առիթ էր դարձել այն հանգամանքը, որ երկրում 75 տոկոսանոց շահութահարկ էր ներմուծվել։ Դա կտրուկ քննադատություն առաջացրեց մի շարք ֆրանսիացի քաղաքական գործիչների կողմից։ Մասնավորապես հանրապետության վարչապետ Ժան Մարկ Էյրոն կինոդերասանի որոշումը վախկոտություն անվանեց, իսկ արարքը`«ողորմելի, արհամարհանքի արժանի»։

Դեպարդյեն այդ մեկնաբանությունը վիրավորական համարեց և ռուսական քաղաքացիություն ստանալու դիմում ներկայացրեց։ Հունվարի 3–ին ՌԴ նախագահ Վլադիմիր Պուտինը ստորագրեց համապատասխան հրամանագիրը, իսկ հունվարի 6–ին դերասանին ՌԴ քաղաքացու անձնագիր հանձնեց։

Ավելի ուշ Դեպարդյեն որպես նվեր Մորդովիայի և Չեչնիայի իշխանությունների կողմից բնակարաններ ստացավ և գրանցվեց Սարանսկում։ Սակայն ինչպես ցույց տվեց ՀԿՈՒՀԿ–ի կողմից անցկացված հարցումը, ռուսներն արդեն այն ժամանակ չէին հավատում, որ Դեպարդյեն Ռուսաստանում է ապրելու։ Հարցվողների մեծամասնությունը (43%) ենթադրում էր, որ նա չի նախատեսում տեղափոխվել իրենց մոտ։ Յուրաքանչյուր հինգերորդը (21%) ենթադրում էր, որ դերասանը միայն որոշ ժամանակ կբնակվի Ռուսաստանում, որից հետո կհեռանա։ Իսկ ընդամենը 5 տոկոսը վստահ էր, որ նա իսկապես կտեղափոխվի Ռուսաստան։ –0–

Ծանոթացեք լուրերին առաջինն ու քննարկեք դրանք մեր Telegram-ում

10:28 14.03.2013