Opel-ը մինչև 3 հազար աշխատակցի կարող է ազատել

ԵՐԵՎԱՆ, 13 սեպտեմբերի. /ԱՌԿԱ/. Ամերիկյան General Motors կոնցեռնի կազմի մեջ մտնող գերմանական Opel ավտոարտադրողի ղեկավար անձնակազմի հաստիքները կարող են կրճատվել 1-3 հազար մարդով, հաղորդում է ՌԻԱ Նովոստին` հղում անելով MarketWatch գործակալությանը։

Ընկերությունը ձգտում է նվազեցնել ծախսերը, ինչով էլ պայմանավորված են հնարավոր կադրային փոփոխությունները։ «Մենք բանակցություններ ենք վարում աշխատակիցների և IG արհեստակցական միության ներկայացուցիչների հետ»,– հայտարարել է Opel–ի ներկայացուցիչը` չմեկնաբանելով մանրամասները։ Կրճատումները կարող են տեղի ունենալ արդեն առաջիկայում, բայց GM–ը ցանկանում է խուսափել հարկադիր ազատումներից։ 

Ավելի վաղ GM–ը փորձում էր  Opel–ի ծախսերի կրճատումը համադրել նոր մոդելներում ներդրումների կատարման միջոցով, սակայն այդ քայլերը բավարար չէին ավտոընկերության շահութաբերության համար։ Եվրոպայի անկայուն տնտեսական իրավիճակի, արտադրական հզորությունների ավելցուկի, թույլ պահանջարկի և տարածաշրջանում լուրջ մրցակցության պայմաններում Opel–ի բիզնեսում փոփոխություններն անհրաժեշտ քայլ դարձան Եվրոպայում GMճի գործունեության շահութաբերության վերականգնման համար։

General Motors–ն ավտոմեքենաների խոշորագույն արտադրող ընկերություն է, հիմնվել է 1908 թվականին։ ԸՆկերության միջազգային շտաբ–բնակարանը Միչիգան նահանգի Դետրոյթ քաղաքում է։ Աշխարհի ավելի քան 120 երկրներում գտնվող GM ձեռնարկություններում աշխատում է 209 հազար մարդ։ GM–ը և նրա ռազմավարական գործընկերներն ուղևորատար և բեռնատար ավտոմեքենաներ են արտադրում 31 երկրում, այդ թվում` սպասարկում և վաճառում են հետևյալ ապրանքանիշների արտադրանք` Baojun, Buick, Cadillac, Chevrolet, GMC, Daewoo, Holden, Isuzu, Jiefang, Opel, Vauxhall և Wuling։ 

Opel –ը գերմանական ավտոմոբիլային ընկերություն է, հիմնվել է 1863 թվականին։ Շտաբ բնակարանը գտնվում է Ռյուսելհայմում։ Հիմնական բաժնետորը Ջենըրըլ Մոթըրսն է։ Ռուսաստանում Opel ավտոմեքենաներն արտադրվում են Պետերբուրգի GM գործարանում և Կալինինգրադի «Ավտոտորում»։ -0-