Եգիպտոսում կատարվող անկարգությունների պատճառով Հայաստանի քաղաքացիները չեն տուժել

ԵՐԵՎԱՆ, 15 օգոստոսի. /ԱՌԿԱ/. Եգիպտոսում տեղի ունեցած անկարգությունների հետևանքով տուժածների թվում Հայաստանի քաղաքացիներ այս պահի տվյալներով չկան, հայտնում է «Նովոստի–Արմենիա» գործակալությունը` վկայաբերելով հայկական արտաքին քաղաքական գերատեսչության մամուլի քարտուղար Տիգրան Բալայանին։

Նրա խոսքով, այս պահին Եգիպտոսում ապրում է Հայաստանի մոտ 400 քաղաքացի (չհաշված զբոսաշրջիկներին), ներառյալ` երկքաղաքացիություն ունեցող անձինք։

Չորեքշաբթի օրվանից Եգիպտոսում մեկ ամսով հայտարարվել է արտակարգ դրության ռեժիմ, իսկ 11 նահանգներում` պարեկային ժամ։ Այդ որոշումն իշխանություններն ընդունել են նախկին նախագահ Մուհամմեդ Մուրսիի կողմնակիցների և իրավապահ մարմինների բախումներից հետո Կահիրեում։ Երկրի առողջապահության նախարարությունը հայտնում է անկարգություններում զոհված գրեթե 300 մարդու մասին։ Տեղական ԶԼՄ–ների հաղորդմամբ, բախումներ են եղել նաև Խուրգադա հանգստավայրում։ -0-