Ստեփանակերտի օդանավակայանի բացման շուրջ աղմուկն արհեստական է. Կազիմիրով

ԵՐԵՎԱՆ, 29 նոյեմբերի. /ԱՌԿԱ/. Ստեփանակերտի օդանավակայանի բացման շուրջ արհեստական աղմուկ է զարգանում, կարծում է Ռուսաստանի կողմից ԵԱՀԿ Մինսկի խմբի առաջին համանախագահ Վլադիմիր Կազիմիրովը (1992-1996 թթ.), գրում է «Նովոստի-Արմենիա» գործակալությունը:

«Դա, իհարկե, արհեստականորեն զարգացող աղմուկ է: Եթե պետք է Սաֆարովի հետ կապվածը խաղարկել, ահա ձեզ օդանավակայանը: Թե ով է դրա զարգացնողը, կարող եք ինքներդ գլխի ընկնել, ինձ համար դժվար է բացատրել»,- հինգշաբթի «Հարավային Կովկասի տարածաշրջանային անվտանգության դինամիկան» միջազգային համաժողովի ընթացքում լրագրողներին ասաց նա:

Ըստ Կազիմիրովի, Ստեփանակերտի օդանավակայանի բացման հարցը միանշանակ չէ:

«Մի կողմից պետք է դիտարկել մարդկանց տեղափոխման իրավունքը` որպես բնական իրավունք, և այդ իրավունքի խախտման ցանկացած փորձը, իհարկե, ենթակա է դատապարտման: Մյուս կողմից, այդ ամենը տեղի է ունենում հակամարտության պայմաններում»,- նշեց նա:

Ստեփանակերտի օդանավակայանն այսօրվա դրությամբ լիովին պատրաստ է չվերթերի իրականացմանը, այն պաշտոնապես շահագործման է հանձնվել  հոկտեմբերի 1–ին։ Բոլոր համալիր շինարարական աշխատանքների անցկացման համար շուրջ 5 մլն դոլար է ծախսվել,  բոլոր միջազգային չափանիշներով զինված օդանավակայանը կկարողանա սպասարկել ժամում 100 ուղևորի։ Օդանավակայանի նախագծի մշակումն իրականացվել է՝ հաշվի առնելով հետագայում միջազգային չվերթեր իրականացնելու հնարավորությունները:

Ադրբեջանի ներկայացուցիչները պարբերաբար սպառնալիքներ են հնչեցնում այն օդանավերի դեմ, որոնք  դեպի Ղարաբաղ չվերթեր են իրականացնելու: Սակայն հուլիսին ԵԱՀԿ Մինսկի խմբի համանախագահները հայտնեցին, որ Լեռնային Ղարաբաղում նախատեսված օդանավակայանի բացման հետ կապված քաղաքացիական օդանավերի դեմ ուժ չգործադրելու երաշխիքներ  են ստացել։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-