Առաջիկա օրերին հուշագիր կստորագրվի. Ծառուկյանի խոսնակ
ԵՐԵՎԱՆ, 31 հունվարի. /ԱՌԿԱ/. ԲՀԿ հիմնադիր Գագիկ Ծառուկյանի հետ այս օրերին բանակցություններ վարող քաղաքական ուժերի ղեկավարները կստորագրեն ԱԺ ընտրություններին համատեղ մասնակցելու մասին համագործակցության հուշագիր, հայտնել է Ծառուկյանի մամուլի խոսնակ Իվետա Տոնոյանը, հաղորդում է Yerkir.am–ը։
Նա նշել է, որ տարբեր քաղաքական ուժերի հետ քննարկումներն ընթացքի մեջ են:
«Պաշտոնապես դեռ հաստատված չէ օրը, թե երբ կստորագրվի հուշագիրը, բայց որ առաջիկայում լինելու է և նախատեսված է այդ միջոցառումը, դա հաստատ է»,- ընդգծել է Տոնոյանը:
Նա, սակայն չի ցանկացել նշել, թե որ ուժերի հետ հստակ և վերջնական պայմանավորվածություններ կան։
«Այս պահին բազմաթիվ ուժերի հետ բանակցությունները դեռ ընթացքի մեջ են. ոմանց հետ ձեռք են բերվել վերջնական պայմանավորվածություններ, սակայն ես այդ մասին դեռևս չեմ բարձրաձայնի»,- նշել է Տոնոյանը:–0–
