Փաշինյանը և իր քաղաքական թիմը իրենց վրա են վերցրել ամբողջ պատասխանատվությունը երկրում հետագա զարգացումների համար. Բորիս Նավասարդյան
ԵՐԵՎԱՆ, 21 մայիսի. /ԱՌԿԱ/. Այսօրվանից Նիկոլ Փաշինյանը և իր քաղաքական թիմը իրենց վրա են վերցրել ամբողջ պատասխանատվությունը երկրում հետագա զարգացումների համար: Այդ մասին Facebook-ի իր էջում գրել է Երևանի մամուլի ակումբի նախագահ Բորիս Նավասարդյանը:
«Իրենցից է կախված լինելու, կկարողանան այնպիսի քայլեր ձեռնարկել, որոնք կարժանանան լայն հանրության հավանությանը, թե կխորացնեն դժգոհությունները», - նշել է նա:
Ըստ նրա, այլեւս չի ստացվելու որևէ կառույցի, կամ քաղաքական ուժի հետ կիսել, կամ նրանց վրա դնել պատասխանատվությունը թերացումների համար:
«Քաղաքական անզիճում հակառակորդներից բացի այլևս չկա վարչապետի քաղաքական կամքին բաց և արդյունավետ դիմադրություն ցուցաբերող որևէ սուբյեկտ», - նշել է Նավասարդյանը:
Նա ավելացրել է, որ հեղափոխական դիկտատուրայի այլընտրանքը Հայաստանում չկայացավ: «Որպեսզի հեղափոխական դիկտատուրան չվերացվի սովորական դիկտատուրայի, կամ ամբողջությամբ չձախողվի, իշխանությունները պետք է կարողանան բարեփոխումների գործընթացում ներառել բոլոր առողջ ու կարող մարդկային ռեսուրսները, ինչպես նաև միջազգային համագործակցության հնարավորությունները: Վերջիններս էլ չունեն ազնիվ այլընտրանք, քան ընդունել կառուցողական համագործակցության հրավերը», - նշել է նա:
Նա մեկնաբանել է նաև արդարադատության նախկին նախարար Արփինե Հովհաննիսյանի հայտարարությունը, որով նա նախագահ Արմեն Սարգսյանին փաստորեն առաջարկել է անմիջապես վերցնել երկրի կառավարման ղեկը և դժգոհել է վերջինիս մերժումից, վկայում է նախկինների մոտ իշխանափոխության օրակարգի արդիական դառնալու մասին:
Նա հարցրել է, արդյո՞ք, եթե այս պահին առավել լեգիտիմ տարբերակը չաշխատեց, ապա այլ ճանապարհները առայժմ չեն դիտարկվում: «Եթե այո, ե՞րբ և ինչպիսի՞ պայմաններում կարելի է սպասել հաջորդ փորձը: Եվ եթե ոչ, ո՞րն է մոտակա ժամանակ իրենց համար առավել գերադասելի երկրորդ սցենարը», - գրել է Նավասարդյանը:-0-
