Հակառակորդը դիվերսիոն ներթափանցում է ձեռնարկել, բայց հետ է շպրտվել
ԵՐԵՎԱՆ, 22 հունիսի. /ԱՌԿԱ/. Հունիսի 21-ի լույս 22-ի գիշերը ադրբեջանական հատուկ ջոկատայինները դիվերսիոն ներթափանցման փորձ են ձեռնարկել շփման գծում։
Ինչպես հայտնում է Արցախի պաշտպանության նախարարության մամուլի ծառայությունը, պաշտպանության բանակի մարտական հերթապահություն իրականացնող ստորաբաժանումներին հաջողվել է կանխել հակառակորդի առաջխաղացումը։
«ՊԲ մարտական հերթապահություն իրականացնող ստորաբաժանումները, շնորհիվ մարտավարական բարձր պատրաստվածության, դիրքային համակագերի կահավորվածության և տեխնիկական պատշաճ հագեցվածության, ժամանակին հավաստանշել են դիվերսիոն խմբի առաջխաղացումը և հակառակորդին պատճառելով առնվազն 4 զոհ` հետ շպրտել ելման դիրքեր»,– ասվում է հաղորդման մեջ։
Ադրբեջանական կողմը հայկական մերձդիրքային հատվածում թողել է հատուկ գրոհայինների անձնական պարագաներ:
Ինչպես հայտնում են գերատեսչությունից, ներթափանցման փորձը կանխելու ընթացքում ՊԲ-ն կորուստներ չի ունեցել:
Առաջնագծում օպերատիվ իրադրությունը շարունակում է մնալ արցախյան զինուժի լիակատար վերահսկողության ներքո: -0-
Ծանոթացեք լուրերին առաջինն ու քննարկեք դրանք մեր Telegram-ում
19:21 22.06.2017
