ՀՖՖ–ն բողոք է ուղղել ՖԻՖԱ–ին` Բուլղարիա–Հայաստան խաղի մի շարք դրվագների վերաբերյալ

ԵՐԵՎԱՆ, 13 սեպտեմբերի. /ԱՌԿԱ/. Հայաստանի ֆուտբոլի ֆեդերացիան բողոք է ներկայացրել ՖԻՖԱ–ին 2014 թվականի աշխարհի առաջնության ընտրական փուլի երկրորդ տուրում Բուլղարիայի և Հայաստանի հավաքականների միջև կայացած խաղի մի շարք դրվագների վերաբերյալ, որի ժամանակ հայկական թիմը պարտվել է 1։0 հաշվով։

Ավելի վաղ բուլղարական մի շարք ԶԼՄ–ներ տեղեկություն են տարածել այն մասին, որ հայկական կողմը բողոքել է ՖԻՖԱ–ին բուլղարացի երկրպագուների հետ կապված, ովքեր խաղի ժամանակ վանկարկում էին «Գնչուներ» հայ ֆուտբոլիստների և ֆուտբոլասերների հասցեին։ 

Բուլղարական լրատվամիջոցները հայտնում են նաև, որ ՀՖՖ–ն ևս մեկ բողոք է ներկայացրել շվեյցարացի դատավոր Շտեֆան Շտուդերի դեմ, ով հայ ֆուտբոլիստներին երկու կարմիր քարտ է ցույց տվել։ 

«Մի շարք բուլղարական ԶԼՄ–ներ խոսել են այս թեմայով, բայց նրանց հաղորդումներում բազմաթիվ անճշտություններ կան։ ՀՖՖ–ն բողոքարկել է Բուլղարիա–Հայաստան խաղի այն պահերը, որոնք, ՖԻՖԱ–ի կանոնակարգի համաձայն, ազգային ֆեդերացիաներն իրավունք ունենա բողոքարկել։ Այդ պահերը կապված են բացառապես ֆուտբոլային կանոնների հետ»,– նշվում է ՀՖՖ մամուլի ծառայության հաղորդման մեջ, տեղեկացնում է «Նովոստի–Արմենիան»։ 

Հայտարարությունում նշվում է, որ ՀՖՖ–ն նպատակահարմար չի համարում հրապարակել բողոքի մանրամասները, քանի որ այդ հարցերը կուղղվեն ՖԻՖԱ–ի քննարկմանը։ 

«Մասնավորապես, ֆուտբոլային հանդիպումների կազմակերպման և կարգապահական հարցերի, ինչպես նաև դրանց արձանագրման մասին հաշվետվությունների կազմման իրավունքը պատկանում է ՖԻՖԱ–ի հանձնակատարին, և ոչ թե ազգային ֆեդերացիաներին»,– ասվում է հաղորդագրության մեջ։ 

Հայաստանն Իտալիայի, Դանիայի, Չեխիայի, Բուլղարիայի և Մալթայի հավաքականների հետ ընդգրկվել է ընտրական փուլի B խմբում։ 

Երկու տուրերից հետո Իտալիայի և Բուլղարիայի հավաքականները հավաքել են չորսական միավոր, հայկական հավաքականն ունի երեք միավոր։ Միայն մեկ խաղ անցկացրած դանիացիներն ու չեխերը հավաքել են մեկական միավոր։ Մրցաշարային աղյուսակը զրո միավորով եզրափակում է խմբի աութսայդերը` Մալթայի հավաքականը։ 

Հայկական ֆուտբոլիստներն առաջին տուրում հաղթեցին մալթացիներին 1։0 հաշվով, իսկ բուլղարացիները ոչ–ոքի են խաղացել իտալացիների հետ` 2։2։ -0-