Հայաստանում հյուրանոցների որակավորման նոր` «5 աստղանի Դելյուքս» կարգ է ներմուծվել

ԵՐԵՎԱՆ, 13 նոյեմբերի. /ԱՌԿԱ/.  ՀՀ ազգային ժողովը երեքշաբթի ընդունել է «Զբոսաշրջության և զբոսաշրջային գործունեության մասին» օրենքում լատարված փոփոխություններն ու լրացումները։

«Հայաստանի Հանրապետությունում գործում է ողջ աշխարհում լայնորեն ճանաչված եւ ամենատարածված 1-5 աստղանի կարգերով հյուրանոցների որակավորման ընթացակարգը` կամավորության սկզբունքով: Միջազգային փորձի ուսումնասիրությունը եւ Հայաստանում հյուրանոցային տնտեսության օբյեկտների որակավորման համակարգի հետ համեմատական վերլուծությունը ցույց է տալիս, որ որոշ երկրներում, բացի հիմնականում կիրառվող  առավելագույն 5 աստղանի որակավորման կարգից, առավել շքեղ եւ նվազագույն պահանջներին լրացուցիչ չափանիշներով գերազանցող հյուրանոցների  տարբերակման համար կիրառվում են 5 աստղից բարձր որակավորման կարգ (օրինակ` «5 աստղանի Դելյուքս») կամ որակավորման կարգ չհամարվող շքանշան (օրինակ` ակոլադա) կամ մակդիր (Սուպերիոր), ինչը Հայաստանում չի կիրառվում», -օրինագիծը ներկայացնելիս ասաց էկոնոմիկայի փոխնախարար Արա Պետրոսյանը։

Նրա խոսքով` 5 աստղանի որակավորման կարգը գերազանցող «5 աստղանի Դելյուքս» որակավորման կարգի ներդրումը և դրանով առավել շքեղ հյուրանոցների տարբերակումը կնպաստի այդպիսի հյուրանոցներում ներդրումների, ինչպես նաև առավել բարձր որակական պահանջներ ունեցող զբոսաշրջիկների ներգրավմանը:

«Պետական տուրքի մասին» օրենքում կատարված լրացումների համաձայն, «5 աստղանի Դելյուքս» կարգի հյուրանոցներից տարեկան կգանձվի 1,5 մլն դրամի տուրք:

Փոխնախարարը հայտնեց նաև, որ, լրացումների համաձայն, հյուրանոցները պարտավորվում են շենքի վրա, ինչպես նաև գովազդային վահանակի վրա նշել այն «աստղային կարգը», որը շնորհվել է հյուրանոցին:

Այսօր Հայաստանում գործում է մոտ 300 հյուրանոցային տնտեսության օբյեկտ, որոնցից մոտ 70-ը՝ հյուրանոցներ: Դրանց առավել մեծ թիվը Երևանում է, Ծաղկաձորում, Ջերմուկում, ինչպես նաև` Դիլիջանում, Գյումրիում, Գորիսում: ($1-409.5 դրամ) -0-

Ծանոթացեք լուրերին առաջինն ու քննարկեք դրանք մեր Telegram-ում

15:15 13.11.2012