«Գազպրոմ Արմենիան» կներդնի շուրջ 143մլրդ դրամ 2025–2029թթ․–ին
ԵՐԵՎԱՆ, 26 դեկտեմբերի․/ԱՌԿԱ/․ ՀՀ հանրային ծառայությունները կարգավորող հանձնաժողովը համաձայնություն է տվել «Գազպրոմ Արմենիա» ընկերության 2025–2029թթ․ ներդրումային ծրագրին։
Ինչպես հայտնում են հանձնաժողովից, «Գազպրոմ Արմենիա» փակ բաժնետիրական ընկերությունը ՀՀ հանրային ծառայությունները կարգավորող հանձնաժողովի համաձայնեցմանն էր ներկայացրել ընկերության 2025-2029 թվականների ներդրումային ծրագիրը՝ 144 027,51 մլն դրամ ծավալով՝ առանց ավելացված արժեքի հարկի:
Ուսումնասիրությունների արդյունքում հանձնաժողովի կողմից ներդրումային ծրագրի ծավալը նվազեցվել է 981,84 մլն դրամով՝ կազմելով է 143 045,67 մլն դրամ:
Սույն թվականի դեկտեմբերի 25-ի նիստում ՀՀ հանրային ծառայությունները կարգավորող հանձնաժողովը հաստատել է «Գազպրոմ Արմենիա» ընկերության 2025-2029 թվականների ներդրումային ծրագիրը, որի հիմնական ուղղություններն են՝ գազափոխադրման համակարգի Աբովյանի գազի ստորգետնյա պահեստարան-կայանի ընդլայնումը, գազափոխադրման համակարգի վերականգնումն ու վերակառուցումը, նոր բաժանորդների միացումները, ինչպես նաև այլ ներդրումներ գազաբաշխման համակարգում։
ՌԴ–ից Հայաստան գազի մատակարարման մասին
«Գազպրոմ-Արմենիա» ՓԲԸ-ն ռուսական «Գազպրոմ» ՓԲԸ էներգետիկ հոլդինգի 100%-անոց դուստր ընկերությունն է, որը Ռուսաստանի Դաշնությունից Հայաստան գազի միակ մատակարարն է ներքին սպառման համար:
