Հայաստանն ու ԱՄՆ–ն քննարկում են ուղիղ չվերթեր սկսելու հնարավորությունն ու «Խաղաղության խաչմերուկ» նախագիծը
ԵՐԵՎԱՆ, 24 դեկտեմբերի․/ԱՌԿԱ/․ ՀՀ ՏԿԵ նախարար Դավիթ Խուդաթյանն ընդունել է Հայաստանում ԱՄՆ դեսպան Քրիստինա Քվինի գլխավորած պատվիրակությանը, հաղորդում է ՀՀ տարածքային կառավարման և ենթակառուցվածքների նախարարությունը։
Նախարարը ողջունել է դեսպանին և ընդգծել Հայաստան-ԱՄՆ կապերի, համագործակցության խորացման կարևորությունը։
Դեսպանը շնորհավորել է պաշտոնի նշանակման կապակցությամբ և պատրաստակամություն հայտնել շարունակել ու ընդլայնել առկա համագործակցությունը ՏԿԵ նախարարության հետ։
Քննարկվել է համատեղ իրականացվող մի շարք ծրագրերի ընթացքը։ Անդրադարձ է կատարվել Էներգետիկ, ՏԻՄ ոլորտում համագործակցությանը, «Խաղաղության խաչմերուկ» ծրագրին, որի վերաբերյալ դեսպանը հայտնել է իր աջակցությունը։
Քննարկվել է նաև դեպի ԱՄՆ ուղիղ չվերթեր սկսելու հնարավորությունը։
«Աշխարհի խաչմերուկ» տարածաշրջանային հաղորդակցությունների հայկական նախագիծը ներկայացրել է ՀՀ վարչապետ Նիկոլ Փաշինյանը 2023 թվականի նոյեմբերին Թբիլիսիում կայացած «Մետաքսի ճանապարհ» ֆորումում։ Նախագծի առանցքային գաղափարը Հայաստանի, Վրաստանի, Թուրքիայի, Ադրբեջանի և Իրանի միջև տրանսպորտային հաղորդակցության գործարկումն ու զարգացումն է ճանապարհների, երկաթուղու, մալուխների, խողովակաշարերի և էլեկտրահաղորդման գծերի միջոցով։
Դա հնարավորություն կտա կարճ և արդյունավետ երթուղի ստեղծել Կասպից և Միջերկրական ծովերի միջև, ինչպես նաև Պարսից ծոցից դեպի Սև ծով երթուղի: Համաձայն Հայաստանի դիրքորոշման՝ բոլոր ենթակառուցվածքները գործում են այն երկրների ինքնիշխանության և իրավասության ներքո, որոնց տարածքով նրանք անցնում են. Յուրաքանչյուր երկիր իր տարածքում իրականացնում է սահմանային և մաքսային հսկողություն և ապահովում է ապրանքների, տրանսպորտային միջոցների և մարդկանց տեղաշարժի անվտանգությունը։
