Նռանյան. ԵՏՄ–ն բացառիկ և կայացած ինտեգրացիոն միություն է

ԵՐԵՎԱՆ, հուլիսի 1. /ԱՌԿԱ/. ԵՏՄ–ն բացառիկ և արդեն կայացած ինտեգրացիոն միություն է, ասել է ԵՏՄ կոլեգիայի անդամ (նախարար) Արա Նռանյանը Հայաստանի կառավարության կազմակերպած տնտեսական ֆորումի շրջանակում։

Նրա խոսքերով` կկայանա՞, արդյոք, Միությունը հարցը վաղուց արդեն կորցրել է  արդիականությունը։ Ավելին, ավելորդ վատատեսությունը կարող է միայն խանգարել մասնակից երկրների տնտեսության արդյունավետ աշխատանքին։

Նռանյանը ներկայացրել է ինտեգրացիոն գործընթացների և առավելությունների օրինակներ, որոնք ընձեռում է ԵՏՄ–ն։  Նա հատկապես նշել է, որ ոչ մի ինտեգրացիոն միություն դեռևս չի առաջարկել այն արտոնություններն ու հնարավորությունները, որոնք ստացել են Հայաստանի քաղաքացիներն ու ԵՏՄ–ում գործարար հանրության ներկայացուցիչները։

ԵՏՀ նախարարը նշել է, որ ինտեգրացիոն գործընթացը պետք է կատարվի քայլ առ քայլ, և որ հնարավոր չէ կարճ ժամանակահատվածում բոլոր խնդիրներին միանգամից լուծում տալ։

«Սակայն սա այն ճանապարհն է, որը մենք բոլորս պետք է անցնենք։ Այսօր տարածաշրջանի բոլոր երկրներն, այդ թվում` ԵՏՄ անդամ պետություններն, ունեն որոշակի տնտեսական դժվարություններ։ Ազգային փոխարժեքների արժեզրկումն ու սպառողական պահանջարկի նվազումը չէին կարող չանդրադառնալ տնտեսական ակտիվության վրա։ Սակայն ճգնաժամային իրավիճակները բնորոշ են ժամանակակից տնտեսությանը, և մենք միշտ պետք է պատրաստ լինենք հաղթահարելու դրանք», – ընդգծել է նա։

Հունիսի 30-ին Երևանում կայացած տնտեսական ֆորումին մասնակցել են ՀՀ վարչապետ Հովիկ Աբրահամյանը, խորհրդարանի պատգամավորներ, ինչպես նաև նախարարությունների և գերատեսչությունների, Հայաստանի գիտական և փորձագիտական ոլորտների ներկայացուցիչներ։ 

ԵՏՄ–ն միջազգային ինտեգրացիոն տնտեսական միություն է, որը ստեղծվել է Մաքսային միության և Տնտեսական միասնական տարածքի հիմքի վրա և գործում է այս տարվա հունվարի 1-ից։ Ներկա պահին ԵՏՄ անդամներ են Ռուսաստանը, Հայաստանը, Ղազախստանն ու Բելառուսը, շուտով կազմակերպությանը կմիանա նաև Ղրղըզստանը։--0--