Կփակվեն «Կոշ» և «Հրազդան» քրեակատարողական հիմնարկները, կառավարությունն ընդունեց համապատասխան որոշումը

ԵՐԵՎԱՆ, 28 հոկտեմբերի./ԱՌԿԱ/. «Կոշ» և «Հրազդան» քրեակատարողական հիմնարկները կփակվեն:

Այս որոշումն ընդունել է Հայաստանի կառավարությունը հինգշաբթի կայացած նիստում։

Արդարադատության նախարար Կարեն Անդրեասյանն ասաց, որ կառավարության որոշման այս նախագծով 2022 թ.-ին կտնտեսվի 1,2 մլրդ դրամ։

«Բայց այս նախագիծը միայն փող խնայելու մասին չէ, սա շատ կարևոր մեկնարկ է քրեական համակարգի հետագա բարեփոխման համար»,- ասաց նախարարը։

Անդրեասյանը նաև պարզաբանեց, որ եթե այս նախագիծը հաստատվի, և «Կոշ» և «Հրազդան» ՔԿՀ-ների գործունեությունը դադարեցվի, արդյունքում հանրապետությունում կմնան 10 քրեակատարողական հիմնարկներ, իսկ պայմանների և կառավարման բարելավման դեպքում համակարգը կօպտիմալացվի, և կկարողանան լուծել մարդու իրավունքների հետ կապված մի շարք կարևոր խնդիրներ։

«Այսօր կա 5346 տեղ, որտեղ կարելի է պահել ազատությունից զրկված անձանց, բայց զբաղեցված է 2113-ը, գրեթե բոլոր քրեակատարողական հիմնարկները կիսով չափ դատարկ են։ սա, իհարկե, մի շարք բարեփոխումների և ոլորտում տարված աշխատանքների արդյունք է»- ասաց Կարեն Անդրեասյանը։

Նախարարը նշեց, որ եթե մի քանի տարի առաջ երկրում կար 4530 ձերբակալված և դատապարտված անձ, ապա այժմ նրանց թիվը 2113 է։

«280 աշխատակցի (քրեակատարողական հիմնարկների- խմբ.) կրճատում է լինելու, սա կարող է որոշ քաղաքացիների մոտ դժգոհություն առաջացնել, բայց քրեակատարողական հիմնարկներում վետինգի խնդիր կա: 280 հոգուց 70-ը կտեղափոխվեն այլ քրեակատարողական հիմնարկներ, 50 աշխատող էլ կտեղափոխվի պրոբացիայի ծառայություն, իսկ մնացածը՝ կադրերի ռեզերվ»,- ասաց նա։

Նախագծի հիմնավորման մեջ նշվում է, որ «Կոշ» քրեակատարողական հիմնարկը նախատեսված է 640 անձի պահման համար։ Սակայն ներկա պահին այնտեղ պահվում է ընդամենը 66 մարդ։–0–