Դպրոցները կվերաբացվեն, բայց սահմանափակումներով. ԿԳՄՍ նախարարը մանրամասներ է հայտնել (ՎԻԴԵՈ)
ԵՐԵՎԱՆ, 19 օգոստոսի./ԱՌԿԱ/. Ուսանողներն ու աշակերտները դասի կնստեն դիմակներով, ախտահանիչ միջոցները կապահովեն դպրոցները։ Այս մասին օգոստոսի 18-ին, «Ազատություն» ռադիոկայանին տված հարցազրույցում հայտնել է Կրթության, գիտության, մշակույթի և սպորտի նախարար Արայիկ Հարությունյանը։
Հիշեցնենք, որ ավելի վաղ նախարարը հայտնել է, որ սեպտեմբերի 15-ից դասերը կվերսկսվեն դպրոցներում, իսկ սեպտեմբերի 1-ից՝ բուհերում:
Նախարարը մանրամասնել է, որ դպրոցների համար մշակվել է ուղեցույց, որտեղ շատ հստակ կետ առ կետ նշվում է, թե դպրոցների որ քանակի դեպքում ինչ գործողություններ պետք է արվեն, ընդհանուր բնույթի ցուցումներ են տրվում:
«Դուք տեսնում եք, որ մենք զգալի սահմանափակումները հանում ենք, ըստ էության դասապրոցեսն ամբողջությամբ վերականգնում ենք, ապահովում ենք աշակերտների մեծ հոսք դպրոցներ, և տարրական հակահամաճարակային պայմանները պետք է պահվեն։ Հարցադրումներ են հնչում, թե դիմակների դեպքում ինչպե՞ս է լինելու։ Այստեղ բոլորս պետք է աշխատենք և բացատրենք ծնողներին, աշակերտներին դիմակներ կրելու անհրաժեշտությունը, որովհետև այս սահմանափակումների թեթևացման պայմաններում դիմակը տարածման կանխարգելման ամենալավ միջոցն է»,- նշել է նախարարը։
Հարությունյանը նաև հայտնել է, որ նախատեսում են դասարանների՝ մեծ լինելու դեպքում, դրանք կիսել, որպեսզի հնարավոր լինի ապահովել սոցիալական հեռավորությունը։
«Որքան որակյալ սա մենք կազմակերպենք, այնքան մեծ է հավանակությունը, որ մենք մոտ ապագայում կհրաժարվենք այս սահմանափակումներից և լիարժեք դասապրոցես կիրականացնենք։ Ախտահանման առումով նույնպես ցուցումները տրված են։ Դպրոցները կապահովեն նաև ախտահանման միջոցները, մասնավորապես՝ ձեռքերի ախտահանում, դասարանների ախտահանում դասերից առաջ կամ հետո»,- նշել է նախարարը։
Նախարարը նախօրեին կոչով դիմել է աշակերտներին, ուսանողներին և ծնողներին, որպեսզի հնարավորության դեպքում սեպտեմբերի 1-ից 14-ն ընկած ժամանակահատվածում սահմանափակեն շփումները կամ ինքնամեկուսանան։
«Որպեսզի մենք արդեն ամենասկզբից դասապրոցեսի մեկնարկից ի վեր վիրուսը չբերենք դպրոց և մի մեծ շղթա կտրենք, ինչը մեծ հավանականությամբ մեզ թույլ կտա որևէ սահմանափակման գոնե այս կիսամյակում չգնալ և հետևել այն ծրագրերին, որոնք կիրառվելու են»,-ասել է նա։
Հարությունյանի խոսքով, դասացուցակի թեթևացում է լինելու։ Աշակերտները հնգօրյայի փոխարեն վեցօրյա կայցելեն դպրոցներ։
«Սա շատ կարևոր է։ Մենք երկարացնում ենք ուսումնական շաբաթը, որպեսզի աշակերտները առավելագույնս քիչ ժամանակ անցկացնեն դպրոցում, ինչը զգալի կնվազեցնի վիրուսի տարածումը։ Բացի այդ հաճարակի այցելություններով դասապրոցեսի և կրթության շարունակակությունը կապահովվի։ Առաջանալու է նաև սննդի խնդիր։ Ճաշարաններն ու բուֆետները չեն գործելու և մենք որոշ լուծումներ ենք փորձում այստեղ գտնել, բայց լուծումներից մեկն էլ այն է, որ երեխան որքան քիչ դպրոցում ժամանակ անցկացնի, այնքան սննդի մատակարարման անհրաժեշտությունը նվազում է»,- ասել է նա։
Լրագրողի հարցին՝ դպրոցները հնարավորություն ունե՞ն, որպեսզի, օրինակ 30 աշակերտ ունեցող դասարաները երկու մասի բաժանվեն, Արայիկ Հարությունյանը պատասխանել է՝ այն դեպքում, երբ նման իրավիճակ կառաջանա, երկհերթ կանցկացվեն դասերը։
Նախարարը նաև հայտնել է, թե ինչ միջոցառումներ կիրականացվեն դպրոցներում, եթե դասարաններից մեկում վարակակիր հայտնաբերվի:
«Եթե դպրոցում հայտնաբերվում է վարակված երեխա, ապա ըստ իրավիճակի պետք է հասկանանք` նախ իր համադասարանցիների շրջանում, ամենայն հավանականությամբ, ամբողջական թեստավորում կիրականացվի, և եթե դասարանում այդպես տարածում չկա, ապա դասերը չեն կասեցվի տվյալ դասարանում: Եթե մենք տեսնենք, որ տարածում կա այդ թեստավորման արդյունքում, ապա տվյալ դասարանում դասերը կդադարեցվեն։ Մենք դեռ գարնանից ունենք հեռավար ուսուցման անցկացման կարգ, և ըստ այդ կարգի կիրականացնենք տվյալ դասարանի համար հեռավար ուսուցում»։
Նախարարն ընդգծել է, որ այս միջոցառումները կիրառվելու են թե՛ պետական, թե՛ մասնավոր դպրոցներում։ Արայիկ Հարությունյանը նաև պարզաբանել է, թե ինչո՞ւ են սեպտեմբերի 1-ից դասի գնալու միայն բուհերի բակալավրի առաջին կուրսի ուսանողները։
«Բուհերը, ըստ էության, բավականին մեծ են և պետք է նախապատրաստվեն գործընթացին, որոշում կայացվեց, որ ավելի փոքր թվով ուսանողներով սկսվեն դասերը, որպեսզի բուհերն այդ ընթացքում թերությունները շտկեն, որ ավելի մեծ թվով ուսանողներ հաճախելու դեպքում արդեն ընտելացած լինեն այդ նոր իրավիճակին: Իրականում բուհերի համար և դպրոցների համար էլ միանգամայն նոր իրավիճակ է»,- նշել է նա: -0-
