Wizz Air բյուջետային ավիաընկերությունն ընդլայնում է դեպի Հայաստան իրականացվող չվերթերը

ԵՐԵՎԱՆ, 2 մայիսի./ԱՌԿԱ/. Wizz Air բյուջետային ավիաընկերությունն ընդլայնում է դեպի Հայաստան իրականացվող չվերթերը։

Այսօր՝ մայիսի 2-ին, դեպի Հայաստան իրականացվող նոր ուղղությունների ընդլայնման կապակցությամբ Wizz Air ավիաընկերության հրավիրած ասուլիսի ժամանակ ավիաընկերության ներկայացուցիչ Վալերիա Բրագարենկոն անդրադարձավ բյուջետային ավիաընկերության բիզնես մոդելին, հայկական շուկայում ավիաընկերության առաջիկա գործունեությանը, ինչպես նաև Wizz Air-ի նոր երթուղիների գործարկման ազդեցությանը հայկական զբոսաշրջության ոլորտի վրա:

Ս.թ. ապրիլի 30-ին ավիաընկերությունը մեկնարկել է 2 նոր ուղղություն՝ դեպի Սոֆիա (յուրաքանչյուր չորեքշաբթի և կիրակի) և Դորտմունդ (յուրաքանչյուր չորեքշաբթի և կիրակի):

Իսկ 2023թ. հունիսի 26-ից մեկնարկում են Պրահա-Երևան-Պրահա երթուղով չվերթերը, որոնք կիրականացվեն շաբաթական երկու չվերթ հաճախականությամբ՝ յուրաքանչյուր երկուշաբթի և ուրբաթ:

Մամուլի ասուլիսին ներկա էր նաև ՀՀ ԷՆ զբոսաշրջության կոմիտեի նախագահ Սիսիան Պօղոսեանը, ով ողջունեց ավիաընկերության հետ շարունակական համագործակցությունը, ինչն ավելի շատ զբոսաշրջիկների հնարավորություն կտա բացահայտելու Հայաստանը:–0–