ՀՀ–ն իրանական ընկերությանը 2մլրդ դրամի վարկ է տրամադրել բարձրավոլտ էլեկտրագծերի կառուցումն ավարտելու համար
ԵՐԵՎԱՆ, 22 նոյեմբերի․/ԱՌԿԱ/․ ՀՀ կառավարությունը կտրամադրի 2,07մլրդ դրամի բյուջետային վարկ «Sunir» իրանական ընկերությանը, որը կառուցում է 400 կՎ էլեկտրահաղորդման օդային գծեր։
Նախագծի ընդհանուր արժեքը 106,8մլն եվրո է։
Կառավարության որոշմամբ կապահովվի «Իրան-Հայաստան 400 կՎ էլեկտրահաղորդման օդային գծի և համապատասխան ենթակայանի կառուցում» ծրագրի իրականացումը:
Ըստ հիմնավորման՝ հաշվի առնելով ծրագրի կարևորությունը, դրա իրականացումից ակնկալվող արդյունքը՝ ֆինանսական միջոցների տրամադրումը բյուջետային վարկի միջոցով հնարավորություն կտա այն ավարտին հասցնել հնարավոր սեղմ ժամկետներում:
Այն հնարավորություն կտա ՀՀ և ԻԻՀ միջև էլեկտրաէներգիայի փոխհոսքերը 350 ՄՎտ-ից հասցնել մինչև 1200 ՄՎտ-ի, կբարձրանա Հայաստանի էներգետիկ համակարգի անվտանգության մակարդակը, հուսալիությունը և կայունությունը, հնարավորություն կստեղծվի ամբողջ ծավալով օգտագործել Իրան-Հայաստան գազատարի թողունակությունը՝ «Գազ էլեկտրաէներգիայի դիմաց» ծրագրի շրջանակում:
Նախագծի ավարտի ժամկետը 2034թ․–ի դեկտեմբերի 31–ն է։ Հայկական կողմից նախագծին մասնակցում է «Բարձրավոլտ էլեկտրացանցեր» պետական ՓԲԸ–ն։
