Ամերիաբանկին շնորհվել է Euromoney 2016 Գերազանցության մրցանակ` որպես Տարվա լավագույն բանկ Հայաստանում
ԵՐԵՎԱՆ, 12 հուլիսի. /ԱՌԿԱ/. Ամերիաբանկին շնորհվել է Euromoney 2016 Գերազանցության մրցանակ` որպես Տարվա լավագույն բանկ Հայաստանում։
Այս պատվավոր մրցանակին Ամերիաբանկն արժանանում է չորրորդ անգամ, հաղորդում է բանկի մամուլի ծառայությունը։
Մրցանակը Լոնդոնում հանդիսավոր պայմաններում հանձնվեց Ամերիաբանկի Գլխավոր տնօրենի տեղակալ, ֆինանսական տնօրեն Գևորգ Թառումյանին:
«Արդեն 25 տարի անընդմեջ Euromoney հեղինակավոր ամսագիրն իրականացնում է համաշխարհային մասշտաբով լավագույն ֆինանսական կառույցների գործունեության արդյունքների գնահատման ամենամյա գործընթացը», –նշվում է հաղորդագրության մեջ։
«Ամերիաբանկ» ՓԲԸ–ն Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից` տրամադրում է նորարարական բանկային ծառայությունների լայն տեսականի: «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ:
2016 թ.–ի առաջին եռամսյակի արդյունքում Ամերիաբանկի ակտիվները կազմել են 507,7 մլրդ դրամ, պարտավորությունները` 447,1 մլրդ դրամ, ընդհանուր կապիտալը` 60,6 մլրդ դրամ, կանոնադրական կապիտալը` 39,8 մլրդ դրամ, վարկային ներդրումները` 330,5 մլրդ դրամ։ Բանկի զուտ շահույթը 2016 թ.–ի առաջին եռամսյակում կազմել է 1 195,9 մլն դրամ։–0–
