Հայկական ապրանքների BRIDGE EXPO ցուցահանդեսը տեղի ունեցավ Թբիլիսիում միջազգային տնտեսական համաժողովի շրջանակներում
26.04.2012,
15:50
Հայկական ապրանքների BRIDGE EXPO ունիվերսալ առևտրա - արդյունաբերական ցուցահանդեսը տեղի ունեցավ 21-22-ը Թբիլիսիում՝ BRIDGE միջազգային տնտեսական համաժողովի արտագնա նիստի շրջանակներում, «ԱՌԿԱ» գործակալությանը հայտնեցին «Մաստեր» միջազգային ինտեգրման աջակցության կենտրոնից:
ԵՐԵՎԱՆ, 26 ապրիլի. /ԱՌԿԱ/. Հայկական ապրանքների BRIDGE EXPO ունիվերսալ առևտրա - արդյունաբերական ցուցահանդեսը տեղի ունեցավ 21-22-ը Թբիլիսիում՝ BRIDGE միջազգային տնտեսական համաժողովի արտագնա նիստի շրջանակներում, «ԱՌԿԱ» գործակալությանը հայտնեցին «Մաստեր» միջազգային ինտեգրման աջակցության կենտրոնից:
Միջոցառումների կազմակերպիչներն էին Հայաստանի Արդյունաբերողների և գործարարների (Գործատուների) միությունը և «Մաստեր» միջազգային ինտեգրման աջակցության կենտրոնը` ՀՀ Էկոնոմիկայի նախարարության պաշտոնական աջակցությամբ:
Ցուցահանդես այցելել են Վրաստանի կառավարության և գործարար աշխարհի ներկայացուցիչները, ինչպես նաև Թբիլիսիի բնակիչները: Կազմակերպվել էին անհատական բիզնես-հանդիպումներ, որոնց արդյունքում ստորագրվել են մի շարք համագործակցության պայմանագրեր:
Ցուցահանդեսի պաշտոնական բացման արարողությունը կատարեցին ՀՀ Էկոնոմիկայի նախարարի տեղակալ Տիգրան Հարությունյանը և Վրաստանի Էկոնոմիկայի և Կայուն Զարգացման նախարարի տեղակալ Միխայիլ Ջանելիդզեն:
Հաղորդագրության մեջ նշվում է նաև, որ ֆորումի աշխատանքներին մասնակցում էին ավելի քան 40 հայկական գործարարներ և պետական կառույցների ներկայացուցիչներ: Ցուցահանդեսին մասնակցել է 33 հայկական ընկերություն:
Ֆորումի ընթացքում տեղի ունեցան քննարկումներ «Փոքր երկրների մեծ հնարավորությունները» թեմայով, որոնց շրջանակներում ելույթով հանդես եկան ՀՀ Էկոնոմիկայի նախարարության, Վրաստանի էկոնոմիկայի և Կայուն զարգացման նախարարության ներկայացուցիչները և երկու պետությունների գործարարները:
«Նոր իրականության ընդհանուր կանոնները» սեկցիոն նիստի ժամանակ Զարգացման հայկական գործակալությունը և Վրաստանի Ազգային ներդրումային գործակալությունը հանդես եկան շնորհանդեսներով՝ ներկայացնելով գործարարներին մեր երկրների ներդրումային հնարավորությունները:
«Ֆորումի և ցուցահանդեսի արդյունքում ստեղծվել են նոր գործարար կապեր և քննարկվել են դեպի Վրաստան հայկական ապրանքների արտահանման հնարավորություններն ու հեռանկարները»,- նշվում է հաղորդագրության մեջ:--0--
