Հայաստանում դեղագործության ոլորտն օրենսդրական լուրջ կարգավորման կարիք ունի. դեղագործ

ԵՐԵՎԱՆ, 9 հոկտեմբերի. /ԱՌԿԱ/. Հայաստանի դեղորայքի արտադրության ոլորտը պետական և օրենսդրական լուրջ կարգավորման կարիք ունի, կարծում է Հայաստանի Գիտությունների ազգային ակադեմիայի Օրգանական և դեղագործական քիմիայի գիտահետազոտական կենտրոնի տնօրեն Վիգեն Թոփուզյանը ։

«Հայաստանի դեղորայքի արտադրության ոլորտը կարգավորող օրենքներն ունեն որոշակի անճշտություններ և թերություններ, որոնք այդ ոլորտի լուրջ խնդիրների են հանգեցնում»,– չորեքշաբթի ասաց նա։

Փորձագետի խոսքով` Դեղերի արտադրության գծով կենտրոնի գործունեությունն այս տարի դադարեցվել է GMP (Good Manufacturing Practice – Պատշաճ արտադրական պրակտիկա) ստանդարտի համապատասխանության հավաստագրի բացակայության պատճառով, որը ներդրվել է 213 թվականի հունվարին։

2013 թվականի հունվարից Հայաստանում ներդրվել է GMP դեղորայքի նկատմամբ, իսկ Հայաստանի էկոնոմիկայի նախարարությունը ստուգումներ է սկսել հայկական դեղագործական ձեռնարկություններում` պարզելու համար համապատասխանում է ձեռնարկությունների արտադրանքը  GMP–ի չափանիշներին, թե ոչ։

«Թեպետ մենք երկար տարիներ ի վեր որակյալ արտադրանք ենք թողարկում, այս տարի մենք այլևս դեղամիջոցներ չենք կարող արտադրել, քանի որ մեզ չի տրվել GMP հավաստագիր։ Միաժամանակ, մեր կենտրոնի արտադրանքը համապատասխանում է նորմերին»,– ասաց Թոփուզյանը։

Նա պարզաբանեց, որ իրենց Կենտրոնի դեղամիջոցների` GMP չափանիշներին չհամապատասխանելու հիմնավորումներից մեկն այն էր, որ դեղորայքի արտադրությունն իրականացվում է վերջին եվրաչափանիշներին չհամապատասխանող տեխնիկական սարքավորումներով։

Այս համատեքստում Թոփուզյանը նշեց, որ չկան կոնկրետ չափանիշներ և փաստաթղթեր, որոնց համաձայն եվրոպական չափանիշներին հայկական արտադրանքի համապատասխանության մոնիթորինգ է անցկացվում։

«Ես բազմիցս կոչ եմ արել համապատասխան կառույցներին մշակել հայերեն լեզվով համապատասխան փաստաթուղթ, որով կսահմանվեն անհրաժեշտ բոլոր չափանիշները և կտրվի GMP հավաստագիր։ Մինչ օրս իմ դիմումն անպատասխան է մնում»,– ասաց փորձագետը։

Թոփուզյանն ավելացրեց նաև, որ դեղամիջոցներ արտադրող հիմնական հայկական ընկերությունները նույնպես չունեն GMP հավաստագիր, սակայն շարունակում են գործել։

«Իմ տվյալներով, Հայաստանի ոչ մի դեղորայք արտադրող ձեռնարկություն 10 ամիսների ընթացքում ձեռք չի բերել այս հավաստագիրը»,– ասաց նա։

«ԱՌԿԱ» գործակալությունը հանրապետության Առողջապահության նախարարություն հարցում է հղել Թոփուզյանի դիմումի վերաբերյալ մեկնաբանություն ստանալու համար։

Հայաստանի ազգային վիճակագրական ծառայության տվյալներով, 2013 թվականի հունվար–օգոստոսին դեղագործական արտադրանքի արտադրությունը կազմել է 3 315.3 մլն դրամ (2012 թվականի նույն ժամանակահատվածի համեմատ աճը` 37,4%)։

Հայաստանի Գիտությունների ազգային ակադեմիայի Օրգանական և դեղագործական քիմիայի գիտահետազոտական կենտրոնը ստեղծվել է 2006 թվականին։ Հաստատությունը մասնագիտանում է օրգանական և դեղագործական քիմիայի ոլորտի գիտական հետազոտությունների, օրգանական սինթեզի գիտական և տեխնոլոգիական հիմքերի մշակման, ինչպես նաև դեղորայքի և քիմիական նյութերի արտադրության ոլորտում։ ($1 – 405,75 դրամ)։ -0-