Հայաստանում գործարկվել է առաջին «Փոստմոբիլ»-ը

ԵՐԵՎԱՆ, 23 ապրիլի. /ԱՌԿԱ/. «Հայփոստ» ՓԲԸ-ն սկսել է «Փոստմոբիլ»-ի գործարկումը` նոր համակարգ, որը կընդլայնի «Հայփոստ»-ի ցանցը։

««Փոստմոբիլ»-ի գաղափարն իրագործվել է «Հայփոստ»-ի գործընկերների` Իտալիայի, ՌԴ-ի և Ֆրանսիայի փոստային օպերատորների հաջողված փորձի հիման վրա: Այն փոստային բաժանմունք է անիվների վրա` հարմարեցված Հայաստանի կլիմայական և լանդշաֆտային պայմաններին:

««Փոստմոբիլի» գործարկումը թույլ կտա ընդլայնել մեր ընկերության ցանցը` հանրապետության գյուղական համայնքների բնակիչների համար հասանելի դարձնելով ժամանակակից փոստային, ֆինանսական և առևտրային ծառայությունները»,– «Փոստմոբիլի» շնորհանդեսի ժամանակ ասել է Haypost Trust Management B.V. (ընկերության վստահելի կառավարիչ) գլխավոր տնօրեն Խուան Պաբլո Գեչիջյանը։

Ըստ նրա` սկզբնական շրջանում «Փոստմոբիլ»-ը պարբերաբար կայցելի Արագածոտնի գյուղական համայնքներ, որտեղ առկա են փոստային բաժանմունքներ և այն համայնքներ, որտեղ փոստային ծառայությունները նախկինում անհասանելի են եղել:

Փոստային բաժանմունքը համայնքեր կայցելի ամեն շաբաթ որոշակի ժամերի և կկայանվի նախապես սահմանված վայրերում: Բնակիչները կարող են իրականացնել կոմունալ վճարումներ, դրամական փոխանցումներ, բաժանորդագրվել, օգտվել կատալոգային վաճառքի, ապահովագրության և ավանդական փոստային ծառայություններից:

«Փոստմոբիլ»-ը հագեցած է տեխնիկական սարքավորումներով` էլեկտրաէներգիայի գեներատորով, համակարգչային սարքավորումներով, ջեռուցման, օդորակման, ինչպես նաև անվտանգության և տեսագրման համակարգերով: Շարժական փոստային բաժանմունքն առցանց կապով միացված կլինի գլխամասին նույն համակարգով, ինչը գործում է «Հայփոստ»-ի ողջ ցանցում:

Ներդրված GPS համակարգը թույլ կտա վերահսկել երթուղին գլխամասից, ինչը կհանգեցնի անվտանգության և մատուցվող ծառայությունների մակարդակի աճին:

«Հայփոստ» ՓԲԸ–ն Հայաստանի ազգային փոստային օպերատորն է և գործում է Հայաստանի տարածքում գտնվող  900 փոստային բաժանմունքների միջոցով։ –0–