ՀՀ նախկին նախագահ Քոչարյանի մասնաբաժինը «Սիստեմա» ԲՖԿ-ում ավելացել է

ԵՐԵՎԱՆ, 11 հուլիսի. /ԱՌԿԱ/. «Սիստեմա» ԲՖԿ-ն, որպես նախորդ տարվա պարգևատրում, տնօրենների խորհրդի անդամներին հատկացրել է մոտ 0,01 բաժնետոմս (965,831 արժեթուղթ): Ինչպես հաղորդում է «Նովոստի-Արմենիա» գործակալությունը, այս մասին հաղորդում է «ՌԻԱ Նովոստին»՝ հղում անելով կորպորացիայի հաղորդագրությանը:

Հուլիսի 11-ի դրությամբ ԲՖԿ-ի սովորական բաժնետոմսը Մոսկվայի բորսայում արժե 47,1 ռուբլի: Այսպիսով` տնօրենների խորհրդին հատկացրած բաժնետոմսերի փաթեթն արժե 45,491 մլն ռուբլի: Ավելի վաղ այդ բաժնետոմսերը գտնվում էին «Սիստեմա ֆինանս ինվեսթմենթս»-ի հաշվեկշռում, որը ԲՖԿ-ի մոտ 1,4 տոկոսի սեփականատերն է:

Մասնավորապես, խորհրդի յոթ անդամ ստացել է 75,833 հազարական արժեթուղթ (կանոնադրական կապիտալից 0,0078-ական տոկոս), նրանցից մեկը՝ անկախ տնօրեն, ԵՄ առևտրի նախկին հանձնակատար և Մեծ Բրիտանիայի կաբինետի նախկին առաջին նախարար Փիթեր Մանդելսոնն առաջին անգամ ԲՖԿ-ում մասնաբաժին ստացավ: Խորհրդի ևս վեց անդամներ ստացան 72,5 հազարական բաժնետոմս (0,0075 տոկոս):

Արդյունքում, ԲՖԿ-ի հիմնադիր և տնօրենների խորհրդի նախագահ Վլադիմիր Եվտուշենկովի մասնաբաժինն ավելացավ՝ հասնելով 64,1862 տոկոսի, «Սիստեմա» ԲՖԿ-ի նախագահ Միխայիլ Շամոլինի մասնաբաժինը հասավ 0,1568 տոկոսի, խորհրդի փոխնախագահ Ալեքսանդր Գոնչարուկի մասնաբաժինը հասավ 0,1892 տոկոսի, «Վիմմ-Բիլ-Դան» խմբի համահիմնադիր Դավիդ Յակոբաշվիլու մասնաբաժինը հասավ 0,0051 տոկոսի, «РТИ» ԲԲԸ-ի գլխավոր տնօրեն Սերգեյ Բոևի մասնաբաժինը՝ 0,0148 տոկոսի:

Moody International-ի տնօրենների խորհրդի ղեկավար Բրայան Դիկի մասնաբաժինն ավելացավ՝ հասնելով 0,0020 տոկոսի, «Սիստեմա»-ի բարեգործական հիմնադրամի հոգաբարձուների խորհրդի անդամ Դմիտրի Զուբովի մասնաբաժինը հասավ 1,0310 տոկոսի, ՀՀ նախկին նախագահ Ռոբերտ Քոչարյանի մասնաբաժինը՝ 0,0052 տոկոսի, Լյուքսեմբուրգի տնտեսության և արտաքին առևտրի նախկին նախարար Ժանո Կրեկի մասնաբաժինը՝ 0,0025 տոկոսի, KPMG-ի ռուսական ստորաբաժանման նախկին ղեկավար Ռոջեր Մանինգսի մասնաբաժինը հասավ 0,0043 տոկոսի, Barclays Capital-ի փոխնախագահի մասնաբաժինը՝ 0,0020 տոկոսի, Total ֆրանսիական նավթային հսկայի և Alcatel ընկերության նախկին ղեկավար Սերժ Չուրուկի մասնաբաժինը հասավ 0,0034 տոկոսի:

ՀՀ նախկին նախագահ Ռոբերտ Քոչարյանը «Սիստեմա» ԲՖԿ-ի բաժնետեր է դարձել 2010 թ.-ի հուլիսին, երբ «Սիստեմա» ԲՖԿ-ն որպես պարգևատրում տնօրենների խորհրդի անդամներին հատկացրեց 1,1 մլն դոլարի (ելնելով ԲՖԿ-ի GDR-ի գնից հուլիսի 15-ին LSE-ի փակման ժամանակ՝ 23,86 դոլար մեկ արժեթղթի դիմաց) բաժնետոմս: Այն ժամանակ ՀՀ նախկին նախագահ Ռոբերտ Քոչարյանն առաջին անգամ կորպորացիայի բաժնետեր դարձավ, որում ներառվեցին նաև «Սիստեմայի» նախագահ Լեոնիդ Մելամեդն ու Shyam Group of India-ի ղեկավար Ռաջիվ Մեհրոթրան (Rajiv Mehrotra): Տնօրենների խորհրդի ամեն անդամին հատկացված բաժնետոմսերի քանակը կազմում է մոտ 0,0009 տոկոս՝ ընկերության  9,650 մլրդ բաժնետոմսից:

«Սիստեմա» ԲՖԿ-ն ընկերություններ է միավորում հեռահաղորդակցության, տեխնոլոգիաների, ապահովագրման, անշարժ գույքի, մանրածախ առևտրի, բանկային հատվածի և բժշկության ոլորտներում։ ԲՖԿ-ի կանոնադրական կապիտալը կազմում է 868,5 մլն ռուբլի, այն կազմված է 0,09 ռուբլի անվանական արժեքով 9,65 մլրդ սովորական բաժնետոմսերից: LSE-ում GDR-ի տեսքով սակարկվում է մոտ 19 տոկոս բաժնետոմս (մեկ GDR-ը հավասար է 20 սովորական բաժնետոմսի), Մոսկվայի բորսայում՝ 5,2 տոկոս բաժնետոմս:-0-