Երևանի կոնյակի գործարանը 2013թ.–ին 35 հազար տոննա խաղող կգնի

ԵՐԵՎԱՆ, 8 ապրիլի. /ԱՌԿԱ/. Երևանի կոնյակի գործարանը 2013թ.–ին 35 հազ. տոննա խաղող կգնի, ինչը ռեկորդային ցուցանիշ է, երկուշաբթի լրագրողներին հայտնեց գործարանի գործադիր տնօրեն Արա Գրիգորյանը։
 
«Նախկին ռեկորդային ցուցանիշը` 32 հազ. տոննան, գրանցվել էր 1998 թվականին»,– ասաց Գրիգորյանը։

Նա ընդգծեց, որ ԵԿԳ–ի արտադրության ծավալները 2012 թվականին, 2011 թվականի համեմատ, աճել են 25 տոկոսով` կազմելով 3.5 մլն լիտր կոնյակ` 2011 թվականի 2.7 մլն լիտրի դիմաց։

Ինչ վերաբերում է ընթացիկ բյուջետային տարվան, ապա 2012 թվականի հուլիսից մինչև 2013 թվականի փետրվարը գրանցվել է 27 տոկոսի աճ։ Գրիգորյանի խոսքով` դա հսկայական ցուցանիշ է և կազմում է ավելի քան մեկ միլիոն լիտր կոնյակ։

«Ամենահաջող ելքի դեպքում 2013 թվականին մենք կարող ենք գրանցել 30–տոկոսանոց աճ, սակայն այդ ցուցանիշին մենք, հավանաբար, չենք հասնի»,– ասաց Գրիգորյանը` նկատելով, որ գործարանի նպատակն արտադրության ծավալի ոչ թե անվերահսկելի, այլ խելամիտ աճի ապահովումն է։

Գործարանի գործադիր տնօրենը նշեց նաև, որ ԵԿԳ–ի արտադրանքը կազմում է Հայաստանի ներքին շուկայի 19 տոկոսը։ «Երեք և հինգ աստղանի կոնյակների շարքում ԵԿԳ–ի արտադրանքը կազմում է 30 տոկոս, պրեմիում կարգի կոնյակների շարքում` 65 տոկոս, սուպերպրեմիում կարգի կոնյակների շարքում` 97 տոկոս։ Էկ ու՞ր աճենք»,– ընդգծեց ԵԿԳ–ի գործադիր տնօրենը։ Նա ավելացրեց նաև, որ ներկայում մեծ պահանջարկ է վայելու առայժմ ոչ պակաս քան 3000 դրամ արժողության կոնյակը։

Երևանի կոնյակի գործարանը հիմնվել է 1887 թվականին։ Գործարանի ժամանակակից համալիրը գոյություն ունի 1953 թվականից։ 1998 թվականի հունիսին ԵԿԳ–ն ընդգրկվել է Պեռնո Ռիկար խմբի կազմում։ Այդ կորպորացիային են պատկանում ոգելից խմիչքների մի շարք ապրանքանիշներ, և այն աշխարհում երկրորդ տեղն է զբաղեցնում ոգելից խմիչքների արտադրության և վաճառքի ցուցանիշով։ Պեռնո Ռիկար ընկերությունը ԵԿԳ–ն ձեռք է բերել միջազգային տենդերով` 30 մլն դոլարով։