Իրանը Երևանում առևտրի կենտրոն կբացի

ԵՐԵՎԱՆ, 19 սեպտեմբերի./ԱՌԿԱ/. Երևանում կբացվի իրանական առևտրի կենտրոն՝ որպես դարպաս դեպի Եվրասիական տնտեսական միություն (ԵԱՏՄ), հայտնում է Mehr News գործակալությունը։

Բացման արարողությունը տեղի կունենա հոկտեմբերի 1-ին Հայաստանի էկոնոմիկայի նախարարի, Իրանի արդյունաբերության, հանքերի և առևտրի նախարարի, ինչպես նաև գործարարների և Իրանի խոշորագույն արդյունաբերական կենտրոնների ղեկավարների մասնակցությամբ։

18 հազար ք/մ մակերեսով առևտրի կենտրոնը ներառում է 107 ցուցահանդեսային տաղավարներ, որոնք կարող են օգտագործվել արդյունաբերության տարբեր ոլորտներում, որպես կոնֆերանսների սրահ, Business-to-Business (B2B) հանդիպումների համար, որպես միջոցառումների, կոնֆերանսների և փառատոների անցկացման վայր:

Կենտրոնը կնախապատրաստի ֆինանսական փոխանցումներ, կտրամադրի լոգիստիկ և տրանսպորտային ծառայություններ, իրավաբանական խորհրդատվություն, հարկային և մաքսային ծառայություններ։

2023 թվականի սեպտեմբերի 25-ին ԵԱՏՄ-ի և Իրանի միջև ստորագրվել է ազատ առևտրի գոտու մասին լայնամասշտաբ համաձայնագիր, որը կփոխարինի 2019 թվականից գործող ժամանակավոր համաձայնագրին։ Փաստաթուղթը, մասնավորապես, նախատեսում է ապրանքատեսականու գրեթե 90%-ի մաքսատուրքերի վերացում, որին բաժին է ընկնում փոխադարձ առևտրի ավելի քան 95%-ը։

Նոր համաձայնագրի շնորհիվ ԵԱՏՄ երկրների ֆերմերները բացառիկ պայմաններ կստանան դեպի Իրան մատակարարումների համար, մասնավորապես՝ հացահատիկ, եգիպտացորեն, բուսական յուղեր, խոշոր եղջերավոր անասունների և գառան միս, միս և թռչնամիս, պահածոներ և հրուշակեղեն։ Արդյունաբերական ապրանքների ոլորտում անմաքս առևտրի ռեժիմ է սահմանվել մետաղագործության, քիմիական և փայտամշակման արդյունաբերության, օդանավերի և նավաշինության, մեքենաշինության, երկաթուղային մեքենաների և սարքավորումների արտադրանքի համար:

Նաև լրացուցիչ պայմանավորվածություններ են ձեռք բերվել, մասնավորապես, տեխնիկական կարգավորման, սանիտարական, անասնաբուժական և բուսասանիտարական միջոցառումների, մաքսային վարչարարության ոլորտներում։

Ծանոթացեք լուրերին առաջինն ու քննարկեք դրանք մեր Telegram-ում

14:27 19.09.2024