Որոշ տրանսպորտային ծառայություններ մատուցող կազմակերպություններից վարորդների ներհոսք է նկատվում. փոխքաղաքապետ
ԵՐԵՎԱՆ, 3 դեկտեմբերի․/ԱՌԿԱ/. Կան աշխատանքային պայմաններ, ոչ ոք ոչ ոքի բռնի ուժով չի պահում և չի պարտադրում աշխատել։ Այս մասին այսօր կայացած ասուլիսում հայտարարեց փոխքաղաքապետ Սուրեն Գրիգորյանը՝ անդրադառնալով ավտոբուսի վարորդների գործադուլին։
Փոխքաղաքապետը նշեց՝ եթե իրենք վատ գործատու են, մարդը կարող է ուղղակի հեռանալ, «բայց այդ հեռանալուն էլ ձև կա»։
«Անգամ աշխատանքային օրենսգիրքն է այդ հարցը կարգավորում, որ երբ ուզում ես աշխատանքից հեռանալ, կա նախնական ծանուցման ժամկետ։ Չի ենթադրվում, որ ցանկացած գործատու ամեն օր պետք է պատրաստ լինի մի վայրկյանում աշխատողի փոխարինող գտնի։ Զոռով չենք պահում, նախապես ծանուցում ես, գնում ես իդեալական պայմաններով աշխատանքիդ, եթե այդպիսի պայմաններ այսօր կան»,-ասաց նա։
Գրիգորյանի խոսքով՝ որոշ տրանսպորտային ծառայություններ մատուցող կազմակերպություններից վարորդների ներհոսք է նկատվում։
«Որովհետև պայմանները համեմատաբար ավելի լավն են»,-նշեց նա։
