«Արմենիա» միջազգային օդանավակայաններ» ՓԲԸ–ն Գյումրու «Շիրակ» օդանավակայանում նախատեսում է ներդնել 5 մլն դոլար

ԵՐԵՎԱՆ, 18 հոկտեմբերի./ԱՌԿԱ/. Գյումրու «Շիրակ» օդանավակայանի զարգացման, ինչպես նաև բյուջետային ավիաընկերությունների ներգրավման նպատակով միայն վերջին կիսամյակում «Շիրակ» օդանավակայանի Օդանավերի փրկարարական և հակահրդեհային (ՕՓՀ) ծառայությունը համալրվել է Striker-3000 հրշեջ ավտոմեքենայով, ավտոմեքենայի մարտկոցների լիցքավորման հարմարություններով, մարտական հագուստներով, նոր կրակմարիչներով, մարզասրահը՝ մարզական գույքով, ՕՓՀԾ կայանը և դիտակետը՝ կապի միջոցներով, իսկ ՕՓՀԾ անձնակազմը՝ երիտասարդ կադրերով, հաղորդում է «Արմենիա» միջազգային օդանավակայաններ» ընկերությունը։

«Հիշեցնենք նաև, որ վերջին 2 տարվա ընթացքում «Արմենիա» միջազգային օդանավակայաններ» ՓԲ ընկերությունը Գյումրու «Շիրակ» օդանավակայանում ներդրել է 4 մլն ԱՄՆ դոլար և առաջիկա 2 տարվա ընթացքում նախատեսում է ներդնել ևս 5 մլն ԱՄՆ դոլար, որի արդյունքում, 8 տարվա ընթացքում, ընդհանուր ներդրումը կկազմի 20 մլն ԱՄՆ դոլար», – նշվում է հաղորդագրության մեջ:–0–