ՀՀ կառավարության աշխատակազմի ղեկավար․ Լարսի անցակետի փակելը չի ազդի Հայաստանի վրա, եթե հայերը գնեն բացառապես հայկական արտադրության ապրանքներ

ԵՐԵՎԱՆ, 28 նոյեմբերի․/ԱՌԿԱ/․ ՀՀ կառավարության աշխատակազմի ղեկավար Արայիկ Հարությունյանը կարծում է, որ Վերին Լարսի անցակետի փակելը չի ազդի Հայաստանի վրա, եթե հայերը գնեն բացառապես հայկական արտադրության ապրանքներ։

«Հիմա չափազանց կարևոր է, որ հայերը՝ Հայաստանում և Սփյուռքում գնեն բացառապես հայկական արտադրության ապրանքներ՝ գյուղատնտեսական ապրանքներ, խմիչք, Հայաստանի ընկերությունների կողմից մատուցվող ծառայություններ: Բիզնեսին և հարկ վճարողին նման կերպ աջակցելն Անկախությունն ու Սուվերենությունն ամրապնդելու համար կենսական նշանակության վարքագիծ է», – գրել է Հարությունյանը Facebook-յան իր էջում։

Նա կարծում է, որ «որևէ ԼԱՐՍԻ անցակետ փակելը մեր վրա չի ազդի, եթե Հայաստանի բիզնեսը նոր շուկաներ գտնի արտասահմանում ապրող մեր հայրենակիցների տոնական և ոչ տոնական սեղաններին: Ամանորի և Սուրբ ծննդյան տոների սեղաններին պետք է լինի բացառապես հայկական արտադրության բանջարեղեն, միրգ, գինի, կոնյակ, այլ գյուղարտադրանք»։

Ըստ մամուլում շրջանառվող լուրերի՝ Հայաստանից հիմնականում գյուղմթերքներով բեռնված բեռնատարներին թույլ չեն տալիս մուտք գործել Ռուսաստան Վերին Լարսի անցակետով։ Որպես հիմնավորում նշվում է «ֆիտոսանիտարական չափանիշներին չհամապատասխանելը»։ Մինչդեռ փորձագետներն այս արգելքի մեջ քաղաքական դրդապատճառ են տեսնում, քանի որ Հայաստանի վարչապետ Նիկոլ Փաշինյանը հրաժարվել է մասնակցել նոյեմբերի 22-23-ը Մինսկում կայացած ՀԱՊԿ գագաթնաժողովին։–0–