Հայաստանի տնտեսական աճի ներուժը գնահատվում է 5,5%․ ֆինանսների նախարար

ԵՐԵՎԱՆ, 31 հոկտեմբերի․/ԱՌԿԱ/․ Հայաստանի տնտեսական աճի ներուժը ներկայումս գնահատվում է 5,5%, երեքշաբթի ասաց ՀՀ ֆինանսների նախարար Վահե Հովհաննիսյանը։

«Կապիտալ ներդրումները, որոնք մենք իրականացնում ենք, կախված ենք այդ ներուժից։ Իսկ այդ ներուժի մեծությունը կախված է ներդրումներից, մեր տնտեսության դիվերսիֆիկացիայից և այն բարեփոխումներից, որոնք մենք իրականացնում ենք»,- ասաց Հովհաննիսյանը 2024 թվականի պետական բյուջեի նախագծի խորհրդարանական լսումների ժամանակ։

Ըստ նրա՝ կառավարության հիմնական ջանքերը պետք է ուղղված լինեն վերոնշյալ ներուժի ավելացմանը։

Թվեր և կանխատեսումներ Հայաստանի տնտեսության մասին

Հայաստանի տնտեսական աճը 2023 թվականի պետբյուջեում նախատեսված է 7%, իսկ գնաճն ամրագրվել է 4% (±1,5%)։ Հայաստանում տնտեսական ակտիվությունը 8 ամսում տարեկան կտրվածքով աճել է 10,4%-ով։ 2023 թվականի օգոստոսին, նախորդ տարվա օգոստոսի համեմատ, հանրապետությունում գրանցվել է 0,2% գնանկում։

ԿԲ սեպտեմբերյան կանխատեսմամբ՝ այս տարի Հայաստանի տնտեսությունը կաճի 7,2 տոկոսով, իսկ 12-ամսյա գնաճը տարեվերջին կկազմի մոտ 0 տոկոս։

Fitch-ը 2023 թվականին Հայաստանի տնտեսության աճը կանխատեսել է մինչև 6,1%, Moody's-ը՝ մինչև 7%, իսկ S&P-ը՝ 7,5%։ Համաշխարհային բանկի գնահատականներով, Հայաստանի ՀՆԱ-ի աճն այս տարի կկազմի 4,4%, ԵԱԶԲ-ն ակնկալում է, որ Հայաստանի տնտեսությունը կաճի 7,5%-ով, ՎԶԵԲ-ը Հայաստանի տնտեսության աճը գնահատում է 6,5%, իսկ ԱՄՀ-ն կանխատեսում է 5,5% աճ:-0-