Հայկական նոր ԱԷԿ–ի հարցով ԱՄՆ–ի հետ բանակցությունները թևակոխել են առարկայական փուլ
ԵՐԵՎԱՆ, 3 հուլիսի․/ԱՌԿԱ/․ Հայաստանում նոր ատոմակայանի կառուցման շուրջ ԱՄՆ-ի հետ բանակցությունները թևակոխել են առարկայական փուլ, ասաց ՀՀ Անվտանգության խորհրդի քարտուղար Արմեն Գրիգորյանը։
Նա նշեց, որ այս պահին ամերիկյան կողմի հետ քննարկվում է իրավապայմանագրային դաշտը կարգավորելու հարցը, քանի որ առանց դրա այս հարցում առաջ գնալ չեն կարող։
«Այս պահին գնդակը ԱՄՆ–ի դաշտում է։ Մենք ակնկալում ենք, որ այս հարցն անցնի ԱՄՆ ներհամակարգային պրոցեդուրաները, որ դրանից հետո կարողանանք աշխատել»,- նշեց Գրիգորյանը Երևանում «ՀՀ-Արևելյան գործընկերություն-ԵՄ. մարտահրավերներ և հնարավորություններ» համաժողովի ժամանակ։
Նա ընդգծեց, որ այս հարցը երկարաժամկետ է, իսկ կարճաժամկետ հարցերում հաջողության հույս կա։
Ավելի վաղ ՀՀ տարածքային կառավարման և ենթակառուցվածքների փոխնախարար Հակոբ Վարդանյանը հայտնել էր, որ ամերիկյան ընկերությունները մասնակցում են Հայաստանում նոր ատոմակայանի կառուցման հետազոտություններում։
Հայկական ԱԷԿ–ի մասին
Հայկական ատոմակայանը, միակը Հարավային Կովկասի տարածաշրջանում, գտնվում է Մեծամոր քաղաքի մոտ՝ Երևանից մոտավորապես 30 կմ դեպի արևմուտք։ Կայանը երկրի էլեկտրաէներգիայի հիմնական աղբյուրներից մեկն է, որն ապահովում է ընդհանուր արտադրանքի մինչև 40%-ը։ Նրա ծառայության ժամկետը երկարացվել է մինչև 2026 թվականը, աշխատանքներ են տարվում ևս 10 տարով այն երկարաձգելու ուղղությամբ։
Նախատեսվում է 8-10 տարվա ընթացքում կառուցել նոր ատոմակայան, այժմ համեմատվում են տարբեր տարբերակներ և ուսումնասիրվում է Ռուսաստանի, ԱՄՆ-ի և Հարավային Կորեայի գործընկերների փորձը։ «Ռոսատոմ» պետական կորպորացիայի կողմից մշակված 1200 ՄՎտ հզորությամբ նոր էներգաբլոկի կառուցման նախնական տեխնիկատնտեսական հիմնավորումն արդեն իսկ հայկական կողմի քննարկման փուլում է։
