Հայաստանում մշակվող հողտարածքները 2013թ.–ին կազմել են 318,8 հազար հա. գյուղատնտեսության նախարարություն

ԵՐԵՎԱՆ, 17 դեկտեմբերի. /ԱՌԿԱ/. Հայաստանում մշակվող հողատարածքները  2013թ.–ին կազմել են 318,8 հազար հա, երեքշաբթի ասուլիսի ժամանակ ասաց ՀՀ գյուղատնտեսության փոխնախարար Սամվել Գալստյանը։

Նա պարզաբանեց, որ սկսած 2010թ.–ից  Հայաստանում մշակվող հողատարածքներն ավելացել են 35 հազար հեկտարով` 283,6 հազար հեկտարից։

Ընդհանուր առմամբ, ըստ փոխնախարարի, Հայաստանում հերկվող հողերի ընդհանուր տարածքը կազմում է 449,2 հազար հա։

Գալստյանը նշեց, որ հետագայում գյուղատնտեսության նախարարությունը ծրագրում է ոչ միայն աստիճանաբար ավելացնել մշակվող հողատարածքները, այլ նաև բարձրացնել մեկ հեկտարից բերքատվությունը։

Ըստ նրա` մասնավորապես, հացաբույսերի բերքատվությունը նախատեսվում է հասցնել մինչև 30 և ավել ցենտների։

Ըստ ՀՀ գյուղատնտեսության նախարարության տվյալների` Հայաստանում մշակվող հողերի ընդհանուր տարածքները 2013թ.–ի առաջին կիսամյակի արդյունքներով աճել են 7 տոկոսով կամ 25,3 հազար հեկտարով։ –0–