Հայաստանը վավերացրել է Լյուքսեմբուրգի հետ օդային հաղորդակցության հաստատման համաձայնագիրը
05.10.2017,
15:41
Հայաստանը օդային հաղորդակցություն կհաստատի Լյուքսեմբուրգի հետ:
ԵՐԵՎԱՆ, 5 հոկտեմբերի. /ԱՌԿԱ/. Հայ պատգամավորները հինգշաբթի ԱԺ նիստում վավերացրել են Լյուքսեմբուրգի հետ օդային հաղորդակցության հաստատման համաձայնագիրը։
Ինչպես ներկայացնելիս նշեց Քաղաքացիական ավիացիայի գլխավոր վարչության պետ Սերգեյ Ավետիսյանը, համաձայնագիրը ստորագրվել է 2015 թ.–ի դեկտեմբերի 8–ին Լյուքսեմբուրգում և միտված է ազատ մրցակցային դաշտ ապահովել
երկու երկրների ավիափոխադրողների համար։
«Համաձայնագիրը նախատեսում է թռիչքների անվտանգության ապահովման դրույթներ, կարգավորում է ավիափոխադրողների իրավունքները և թռիչքների քանակը», – ասաց Ավետիսյանը։
Նրա խոսքով, համաձայնագիրը կնպաստի օդային հաղորդակցության ոլորտում երկու երկրների միջև հարաբերությունների լիարժեք կանոնակարգմանը և ավիացիոն անվտանգության բարձր մակարդակի ապահովմանը։ –0–
