Վրաստանի տարածքով անցնող գազատարն Ադրբեջանին վաճառելու գործընթացը սկսվել է. թերթ
ԵՐԵՎԱՆ, 7 դեկտեմբերի. /ԱՌԿԱ/. Վրաստանի կառավարությունում այս օրերին ինչ-որ գործընթաց է սկսվել` ադրբեջանական նավթագազային «Soccar» ընկերությանը Վրաստանի տարածքով ռուսական գազը Հայաստան տարանցող հյուսիս-հարավ մայրուղային գազատարը վաճառելու մասով, գրում է «Ժողովուրդ» օրաթերթը:
Այդ մասին պարբերականին հայտնի է դարձել վրացի պատգամավորներից:
Ինչպես տեղեկացրել է թերթին ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը, Վրաստանի վարչապետի հայտարարությունը վերաբերում է Վրաստանի նավթագազային կորպորացիայի բաժնետոմսերի 25 տոկոսի հնարավոր վաճառքի մտադրությանը:
«Նման մտադրության մասին նախկինում ևս հայտարարություններ եղել են: Բայց Վրաստանը դեռևս պաշտոնական որևէ հայտարարություն չի արել, որ նավթագազային կորպորացիայի բաժնետոմսերը հանվել են վաճառքի», - ընդգծել է Հարությունյանը:
Նա ավելացրել է, որ գազատարի անխափան շահագործումը բխում է նաև Վրաստանի շահերից, քանի որ գազի տեղափոխման դիմաց Վրաստանը ստանում է տարանցման վճար: -0-