Եվրամիությունը Հայաստանին 2014թ–ին ավելի քան 47 մլն եվրո է հատկացրել, հայտնում է Հայաստանում ԵՄ պատվիրակության մամուլի ծառայությունը։

ԵՐԵՎԱՆ, 25 մարտի. /ԱՌԿԱ/. Եվրամիությունը Հայաստանին 2014թ–ին ավելի քան 47 մլն եվրո է հատկացրել, հայտնում է Հայաստանում ԵՄ պատվիրակության մամուլի ծառայությունը։

«2014 թվականին Եվրոպական հարևանության գործիքի (ԵՀԳ) շրջանակում ԵՄ–ի ֆինանսավորումը կազմել է 34 մլն եվրո, որոնք ուղղվել են փոքր բիզնեսի և մասնավոր հատվածի զարգացմանը, ինչպես նաև մարդու իրավունքների պաշտպանությանը»,– ասվում է հաղորդման մեջ։

Եվրոպական հարևանության քաղաքականությունը գործարկվել է 2004 թվականին և վերանայվել է 2011 թվականին, այսպես կոչված, «արաբական գարունից» հետո։ Ծրագրի նպատակն է` օժանդակել գործընկերներին ժողովրդավարության, իրավունքի գերակայության և մարդու իրավունքների պահպանման ճանապարհին գտնվող բարեփոխումներում, նպաստել նրանց տնտեսական զարգացմանը և առաջ տանել գործընկերությունը հասարակության հետ միջպետական հարաբերությունների զարգացմանը զուգահեռ։ Հարևանության քաղաքականության շրջանակում ԵՄ–ն ուժեղացնում է գործակցությունը քաղաքականության և անվտանգության ոլորտներում, օժանդակում է տնտեսական և սոցիալական զարգացմանը, օգնում աշխատատեղերի ստեղծման հարցում, ամրապնդում է առևտուրը և այլ հատվածներում գործակցությունը։

Բացի այդ, ԵՄ–ն Հայաստանին տրամադրել է ևս 10 մլն եվրոյի մարդասիրական օգնություն, ինչպես նաև 3.1 մլն եվրո քաղաքացիական հասարակության և տեղական ինքնակառավարման մարմինների զարգացման թեմատիկ ծրագրերի շրջանակում։

2014-2017 թվականներին ԵՄ–ից Հայաստանին հատկացվող աջակցությունը նախապես կկազմի մոտ 170 մլն եվրո։ Այն կուղղվի այնպիսի ոլորտների, ինչպես մասնավոր հատվածի զարգացումը և հասարակական կառավարման բարեփոխումները։ Հիմնական ոլորտներից դուրս կարող են հատկացվել հավելյալ միջոցներ պետական մարմինների և քաղաքացիական հասարակության արդիականացման համար։ -0-