ՀԿԵ պատվիրակությունը մասնակցել է Եվրոպայի, Ամերիկայի և Ասիայի երկաթուղիների սակագնային կարգավորման մարմինների խորհրդաժողովին

ԵՐԵՎԱՆ, 29 հոկտեմբերի. /ԱՌԿԱ/. Հարավկովկասյան երկաթուղու պատվիրակությունը՝ գլխավոր տնօրեն Վիկտոր Ռեբեցի գլխավորությամբ, մասնակցել է Եվրոպայի, Ամերիկայի և Ասիայի երկաթուղիների սակագնային կարգավորմանմարմինների միջազգային խորհրդաժողովին, տեղեկացնում են ՀԿԵ մամուլի ծառայությունից։

Խորհրդաժողովն անցկացվել է սեպտեմբերի 24-25-ը Մոսկվայում և նվիրված է եղել արդյունավետ սակագնային կարգավորմանն ու երկաթուղային տրանսպորտի ենթակառուցվածքներում ներդրումների խթանմանը:

Ինչպես նշված է հաղորդագրության մեջ, ՀԿԵ ղեկավարը խորհրդաժողովի շրջանակում ներկայացրել է «երկաթուղային տրանսպորտի կոնցեսիայի փորձն ու պրակտիկան Հայաստանի երկաթուղու օրինակով»՝ ներկայացնելով ընկերության գործունեության տարբեր կողմերը:

Խորհրդաժողովը կազմակերպել էին ՌԴ Սակագների դաշնային ծառայությունը, ՌԴ տրանսպորտի նախարարությունը, «ՌԵ» ԲԲԸ-ն «Էքսպեդիտորների գիլդիա» ոչ առևտրային համագործակցությունը: Միջոցառմանը մասնակցել են  ներկայացուցիչներ և ղեկավարներ ՌԴ կառավարությունից, կառավարչական մարմինների ներկայացուցիչներ Մեծ Բրիտանիայից, ֆրանսիայից, Գերմանիայից, Ավստրիայից, Իտալիայից, Ֆինլանդիայից, Շվեդիայից, Չեխիայից, Լեհաստանից, Շվեյցարիայից, ԱՄՆ-ից, Կանադայից, Չինաստանից, Լատինական Ամերիկայի երկրներից, Երկաթուղիների միջազգային կազմակերպությունից, Երկաթուղիների համագործակցության կազմակերպությունից, ԱՊՀ և Բալթյան երկրների երկաթուղային վարչություններից, եվրահանձնաժողովից, Եվրասիական տնտեսական կոմիտեից, Եվրոպական երկաթուղային գործակալությունից, գործարար, գիտական ոլորտների ներկայացուցիչներ:  

Խորհրդաժողովի հարթակում քննարկվել են արդյունավետ սակագնային քաղաքականության առանցքային սկզբունքներն ու երկաթուղային ենթակառուցվածքներում ներդրումների խթանման միջոցները, դրանց իրագործումն, ինչպես նաև ճկուն սակագնային քաղաքականության, տրանսպորտային իրավունքի և օրենսդրության հարցեր, սակագնային կարգավորման փորձն ինտեգրացիոն գործընթացների պայմաններում:  -0-