Նավթի գինը տատանվում է ՊԴԾ–ի նիստից առաջ
ԵՐԵՎԱՆ, 15 դեկտեմբերի. /ԱՌԿԱ/. Նավթի համաշխարհային գներն արձանագրում են անորոշ դինամիկա` նվազելով և կրկին աճելով, քանի որ ներդրողները սպասում են Պահուստի դաշնային ծառայության երկօրյա նիստին, որը պետք է մեկնարկի երեքշաբթի։
Ինչպես հաղորդում է Փրայմը, Երևանի ժամանակով ժամը 08։22–ի դրությամբ Brent տեսակի հյուսիսծովային նավթային խառնուրդի փետրվարյան ֆյուչերսների արժեքը նվազել է 0,04 տոկոսով` հասնելով բարելի դիմաց 37,99 դոլարի։ WTI տեսակի նավթի հունվարյան ֆյուչերսների գինը նվազել է 0,22 տոկոսով` հասնելով բարելի դիմաց 36,23 դոլարի։
Ներդրողները սպասում են ՊԴԾ–ի դեկտեմբերյան նիստին, որը կմեկնարկի երեքշաբթի։ Նիստի ժամանակ կարգավորիչը կարող է որոշում ընդունել և 2006 թ.–ի հունիսից հետո առաջին անգամ բարձրացնել տոկոսադրույքը, ինչը կհանգեցնի դոլարի աճին, ինչն էլ իր հերթին բացասաբար կազդի «սև ոսկու» գնի վրա` դարձնելով այն ավելի թանկ արտարժույթ ունեցող ներդրողների համար։
Մյուս կողմից, դոլարի արժեքը նվազում է, ինչը դրական է անդրադառնում նավթի գների վրա։ Դոլարի ցուցիչը (ԱՄՆ վեց հիմնական առևտրային գործընկեր երկրների արտարժույթների նկատմամբ դոլարի փոխարժեքը) նվազել է 0,13 տոկոսով` հասնելով 97,45 կետի։–0–