Փորձագետ. անմիտ մոտեցում կլինի, եթե Հայաստանը հրաժարվի Թուրքիայի հետ ապրանքաշրջանառությունից
ԵՐԵՎԱՆ, 10 մայիսի. /ԱՌԿԱ/. Անմիտ մոտեցում կլինի, եթե Հայաստանն ամբողջությամբ հրաժարվի Թուրքիայի հետ ապրանքաշրջանառությունից, երեքշաբթի մամուլի ասուլիսի ժամանակ ասաց տնտեսագետ Վարդան Բոստանջյանը:
Ավելի վաղ ՀՀ էկոնոմիկայի նախարար Արծվիկ Մինասյանը հաղորդել է, որ դիտարկվում է հանրապետություն թուրքական ապրանքների ներկրումն արգելելու հնարավորությունը: Նրա խոսքով, այս հարցի շուրջ համապատսխան ուսումնասիրություններ են իրականացվում: Առաջին հերթին դիտարկվում են այն ապրանքները, որոնք սպառնում են Հայաստանի տնտեսությանը` թե´ որակի, թե´ մրցակցության տեսանկյունից։
«Հայաստանն ունի ներուժ և հնարավորություններ մի շարք ապրանքների արտադրության հաստատման համար: Կան որոշ ապրանքներ, որոնց թողարկումը Հայաստանը կարող է կազմակերպել մեկ տարվա ընթացքում: Այնուամենայնիվ, դրանց մեծամասնության համար բավական երկար ժամանակ է պետք», - ընդգծեց տնտեսագետը:
Նա ավելացրեց, որ Հայաստանի պետական մարմինները և իշխանություններն արդեն գիտակցել են, որ հարկավոր է շարժվել հենց այդ ուղղությամբ:
Այնուամենայնիվ, տնտեսագետի խոսքով, թուրքական ապրանքներից կտրուկ հրաժարվելը կվնասի ոչ այնքան Թուրքիային, որքան հայ սպառողներին:
Նրա խոսքով, այսօրվա դրությամբ Հայաստանի քաղաքացիները եկամտի ցածր մակարդակի պատճառով նախընտրում են հենց թուրքական ապրանքները։
ԱՎԾ–ի տվյալներով, 2015 թ.-ին Թուրքիայից Հայաստան իրականացված ներկրումը կազմել է 136,9 մլն դոլար` նախորդ տարվա 232,3 մլն դոլարի դիմաց (41 տոկոսի նվազում): Թուրքական ապրանքները կազմում են Հայաստան ներկրվող ապրանքների ողջ ծավալի 4,2 տոկոսը: -0-
