ՀՀ վարչապետը մի շարք կադրային տեղափոխություններ է կատարել կառավարության կազմում

ԵՐԵՎԱՆ, 13 հունվարի. /ԱՌԿԱ/. ՀՀ վարչապետ Հովիկ Աբրահամյանի որոշմամբ Սուրեն Կարայանն ազատվել է ՀՀ ֆինանսների նախարարի տեղակալի պաշտոնից և նշանակվել ՀՀ միջազգային տնտեսական ինտեգրման և բարեփոխումների նախարարի առաջին տեղակալ, երեքշաբթի հաղորդում է ՀՀ կառավարության մամուլի ծառայությունը։

Վարչապետի մեկ այլ որոշման համաձայն` Ստեփան Բարսեղյանն ազատվել է ՀՀ տարածքային կառավարման նախարարի տեղակալի պաշտոնից, իսկ Կարեն Իսախանյանը նշանակվել է ՀՀ տարածքային կառավարման և արտակարգ իրավիճակների նախարարի տեղակալ:

Վաչե Տերտերյանն ազատվել է ՀՀ տարածքային կառավարման նախարարի առաջին տեղակալի պաշտոնից և նշանակվել ՀՀ տարածքային կառավարման և արտակարգ իրավիճակների նախարարի առաջին տեղակալ:

ՀՀ վարչապետ Հովիկ Աբրահամյանի որոշմամբ Արտաշես Բախշյանն ազատվել է Հայաստանի Հանրապետության տարածքային կառավարման նախարարի տեղակալի պաշտոնից և նշանակվել ՀՀ տարածքային կառավարման և արտակարգ իրավիճակների նախարարի տեղակալ:

Դավիթ Կարապետյանը և Հայկարամ Մխիթարյանն ազատվել են ՀՀ արտակարգ իրավիճակների նախարարի տեղակալների պաշտոնից և նշանակվել ՀՀ տարածքային կառավարման և արտակարգ իրավիճակների նախարարի տեղակալներ:

Հայաստանի խորհրդարանը 2014 թ.–ի նոյեմբերին փոփոխություններ է ընդունել «Կառավարության կառուցվածքի մասին» օրենքում, որը նախատեսում է Տարածքային կառավարման նախարարության և Արտակարգ իրավիճակների նախարարության միավորում, ինչպես նաև Միջազգային տնտեսական ինտեգրման և բարեփոխումների նախարարության ձևավորում։

Այսօրվա դրությամբ Հայաստանում գործում է 18 նախարարություն։–0–