Արտաքին լուսավորություն է ապահովվել Երևանի գրեթե տասը փողոցներում ընթացիկ տարում. քաղաքապետարան

ԵՐԵՎԱՆ, 17 հուլիսի. /ԱՌԿԱ/. Երևանի` այս տարի մեկնարկած զարգացման ծրագրերի շրջանակներում մայրաքաղաքի 9 փողոցներում արդեն ավարտվել է արտաքին լուսավորության համակարգի արդիականացման ու լուսավորությամբ ապահովելու գործընթացը, ևս 5-ում՝ աշխատանքները դեռևս ընթացքի մեջ են:

«Հավասարաչափ զարգացման հայեցակարգի համաձայն` փողոցների արտաքին լուսավորման ապահովման աշխատանքներ են իրականացվում մայրաքաղաքի բոլոր վարչական շրջաններում»,– ասվում է քաղաքապետարանի կայքում։

Զարգացման տարեկան ծրագրից բացի, լրացուցիչ ծրագրով ևս 27 բակային տարածքներ են ապահովվել արտաքին լուսավորությամբ: Նույն ծրագրերով լրացուցիչ լուսավորվել է նաև երկրորդական 6 փողոց:

Ինչպես «ԱՌԿԱ» գործակալությանը հայտնեց Երևանի քաղաքապետարանի տեղեկատվության և հասարակայնության հետ կապերի վարչության պետի տեղակալ Արթուր Սարուխանյանը, Երևանի գլխավոր և երկրորդական փողոցների մեծ մասն արդեն լուսավորված է, լուսավորման ցանցի վերականգնումը շարունակվում է հիմնականում նրբանցքներում և բակերում։

Երևանի փողոցների արտաքին լուսավորման ցանցը կազմում է 1337 կմ։ Նախորդ տարվա համեմատ դրա երկարությունն ավելացել է 111 կմ–ով։ -0-