Բյուջետային ծախսերի կատարողականը Հայաստանի սոցիալական պաշտպանության ոլորտում 2013թ.–ին կազմել է 98.6%. Ֆիննախ

ԵՐԵՎԱՆ, 31 մայիսի. /ԱՌԿԱ/. Հայաստանի սոցիալական պաշտպանության ոլորտի բյուջետային ծախսերի կատարողականը 2013 թվականին կազմել է 98.6 տոկոս, շաբաթ օրն ասաց ֆինանսների նախարարի տեղակալ, գլխավոր գանձապետ Ատոմ Ջանջուղազյանը։

«Բյուջեով սոցիալական պաշտպանության համար նախատեսվել է 301.7 մլրդ դրամ։ Կատարողականը կազմել է 98.6 տոկոս, այսինքն, ծախսվել է 297.4 մլրդ դրամ»,– հայտնեց Ջանջուղազյանը ԱԺ պրոֆիլային հանձնաժողովների նիստում` նվիրված 2013 թվականի բյուջեի կատարողականի հաշվետվությանը։ 

Նա ավելացրեց նաև, որ սոցիալական ոլորտի ծախսերը կազմել են բյուջեի ընդհանուր ծախսերի 26.2 տոկոսը, ինչը 5.5 մլրդ դրամով գերազանցել է նախորդ տարվա ցուցանիշները։

Հայաստանի ֆինանսների նախարարության տվյալներով` բյուջեի համախառն եկամուտները 2013 թվականին կազմել են 1071.4 մլրդ դրամ, ծախսերը` 1142.9 մլրդ դրամ, պակասուրդը` 71.5 մլրդ։ ($1-413,28 դրամ)։ -0-