Դրամի փոխարժեքի կտրուկ տատանումները անորոշություն ստեղծեցին Հայաստանի անշարժ գույքի շուկայում

ԵՐԵՎԱՆ, 1 դեկտեմբերի. /ԱՌԿԱ/. Դրամի փոխարժեքի կտրուկ տատանումները անորոշություն ստեղծեցին Հայաստանի անշարժ գույքի շուկայում, հայտարարեց «Ակցեռն» անշարժ գույքի գործակալության տնօրեն Հակոբ Բաղդասարյանը։ «Հայաստանում դրամի փոխարժեքի անկայունությունը մտահոգություն է առաջացրել անշարժ գույքի գնորդների և վաճառողների շրջանում», – երկուշաբթի մամուլի ասուլիսի ժամանակ ասաց Բաղդասարյանը։ Նոյեմբերի 24–ին դոլարի փոխարժեքը Հայաստանում, նոյեմբերի 21–ի ցուցանիշի համեմատ, ավելացել էր 16,6 կետով և 1 դոլարի դիմաց կազմել 435 դրամ` թարմացնելով 8 տարվա առավելագույն ցուցանիշը։ Վերջին անգամ դոլարի փոխարժեքը Հայաստանում հասել էր նման մակարդակի 2006 թ.–ի մայիսին (24.05.2006)` 435,28 դրամ, իսկ արդեն տարեվերջին փոխարժեքը կազմում էր 1 դոլարի դիմաց 363,5 դրամ։ ԿԲ–ի տվյալներով` դոլարի փոխարժեքը ամսվա սկզբից աճել է 5,8 տոկոսով։ Հայկական դրամի արժեզրկումը սկսվել է հոկտեմբերի վերջին Սակայն Բաղդասարյանը վստահություն հայտնեց, որ դրամի փոխարժեքի կայունացման հետ մեկտեղ անշարժ գույքի շուկայի իրավիճակը ևս կկայունանա։ «Մենք աշխուժացում ենք սպասում անշարժ գույքի շուկայում, որը բնորոշ է տարեվերջի համար։ Արտարժույթի փոխարժեքների անկայունությունը ևս կարող է հանգեցնել Հայաստանի նկատմամբ հետաքրքրության բարձրացմանը` որպես ներդրումների համար գոյություն ունեցող առավել անվտանգ վայրի», – ասաց Բաղդասարյանը։ Նրա խոսքերով` վերջին տարիներին Հայաստանի անշարժ գույքի շուկայում ակտիվության դինամիկան գրեթե անփոփոխ է։ «Դրամի և ռուբլու արժեզրկումը, ինչպես նաև միջազգային շուկաներում նավթի գների անկումը կարճաժամկետ հեռանկարում լուրջ խնդիրներ կստեղծի։ Սակայն երկարաժամկետ հեռանկարում ես դրական միտում եմ տեսնում, քանի որ էներգակիրների գների անկումը ևս լուրջ ազդակ կդառնա համաշխարհային տնտեսության զարգացման համար», – կարծում է Բաղդասարյանը։ Հայաստանի անշարժ գույքի կադաստրի պետական կոմիտեի զեկույցի համաձայն` 2014 թ.–ի հոկտեմբերին հանրապետությունում կատարվել է անշարժ գույքի մասնակցությամբ 19501 գործարք, ինչը 6,9 տոկոսով ավել է նախորդ տարվա նույն ժամանակահատվածի համեմատ։ Միաժամանակ հոկտեմբերին կատարված գործարքների թիվը, սեպտեմբերի ցուցանիշի համեմատ, ավելացել է 5,6 տոկոսով։–0–