Ֆ.Օլանդը խոստացել է երկու տարում «վերականգնել» Ֆրանսիան

ԵՐԵՎԱՆ, 10 սեպտեմբերի. /ԱՌԿԱ/. Ֆրանսիայի նախագահ Ֆրանսուա Օլանդը մտադիր է 2014թ.-ին վերադարձնել տնտեսության աճը: Միաժամանակ աշխատանքի շուկայի և աշխատանքային օրենսդրության բարեփոխումները Ֆ.Օլանդը նախատեսում է պատրաստել ընթացիկ տարեվերջին, հաղորդում է РБК-ն՝ հղում անելով TF1 հեռուստաալիքին:

«Ես ամենաիսկական պատերազմն եմ մղում և չեմ հանձնվի: Ես բարեփոխումների հստակ ժամանակացույց կստեղծեմ, ինչը թույլ կտա երկու տարում մեզ վերադարձնել մրցունակությունը: Ես արագացնում եմ: Հստակ գիտեմ, թե ինչ և երբ եմ անում: Ես ինձ վրա եմ վերցնում ամբողջ պատասխանատվությունը և մտադիր եմ կանոնավոր կերպով կապ պահել ֆրանսիացի ժողովրդի հետ»,-ասել է նախագահը:

Մեկնաբանելով 2013թ.-ի բյուջեում 30 մլրդ եվրոյի չափով տնտեսում ապահովելու անհրաժեշտությունը՝ Օլանդը հայտնել է, որ անհրաժեշտ գումարի երկու երրորդը կստացվեն ընկերությունների և ունևոր քաղաքացիների հարկերի բարձրացման հաշվին: Այսպիսով, նա հաստատել է 75 տոկոս հարկ մտցնելու մտադրությունը երկրի հարուստ բնակչության նկատմամբ, ինչի մասին նաև նախկինում է ասվել: «Դրանք լուրջ միջոցներ են, որոնք նախկինում երբեք Հինգերորդ հանրապետության պատմության մեջ չեն կիրառվել, և դա իմ պատասխանատվությունն է»,- հայտենլ է նախագահը:

Սակայն Օլանդի նախաձեռնությունները քննադատություն են առաջացրել ընդդիմության և հասարակ ֆրանսիացիների կողմից: Ըստ սեպտեմբերի 9-ին հրապարակված հասարակական կարծիքի հարցման տվյալների՝  պատասխանողների 60 տոկոսը «ընդհանուր առմամբ դժգոհ են» Օլանդի նախագահական ժամկետի մեկնարկից:

«Թվում է, թե նա լիովին անօգնական նախագահ է, ով տնտեսության աճի հույսեր է արտահայտում այն միջոցների շնորհիվ, որոնք մեզ են հասել Ֆրանսուա Միտերանի  դարաշրջանից: Դա դրանց գրեթե նախապատմական է դարձնում: Սակայն նախագահն իր գործողություններով հաստատել է, որ 33 մլրդ եվրոյի չափով բյուջեի ճեղքվածքը նա լրացնելու է միջին խավի գրպանների միջոցներով»,- հայտնել է «Ազգային ճակատ» պահպանողական կուսակցության ղեկավար Մարին Լե Պենը: -0-