Հակակարկտային նոր արդյունավետ համակարգ է ստեղծվել Հայաստանում
ԵՐԵՎԱՆ, 20 հունիսի. /ԱՌԿԱ/. «Լոկատոր» հայկական ընկերությունը հակակարկտային նոր արդյունավետ համակարգ է մշակել։
«Ուսումնասիրելով աշխարհի հակակարկտային համակարգերի բոլոր առավելություններն ու թերությունները՝ «Լոկատոր» ընկերությունը ստեղծել է նոր սերնդի հակակարկտային կայան, որը թույլ կտա այլևս չանհանգստանալ համակարգի խափանումների և անսարքությունների մասին»,- ասվում է հաղորդման մեջ։
Նորույթն այն է, որ հնարավոր է իրականացնել հակակարկտային կայանների համալիր կառավարում։ Այդպիսի կառավարման օգնությամբ կարելի է ցանկացած ուժգնության, քանակի և ժամանակային միջակայքի կրակոցներ արձակել։ Հենց այդ ֆունկցիան է օգնում բարձրացնել ամբողջ համակարգի արդյունավետությունը։
«Համակարգի ծրագիրը մշակել է «Լոկատոր» ընկերությունը, այն անալոգներ չունի։ Վերջին տարիներին կարկտի դեմ պայքարի աշխատանքները ցույց են տվել, որ թեև գոյություն ունեցող կայանների աշխատանքն ինչ-որ չափով կրճատում է կարկտի հնարավոր վնասը, այնուամենայնիվ, այն չի ապահովում անհրաժեշտ արդյունք, ինչի պատճառով գյուղացիները շոշափելի կորուստներ են կրում»,- նշեց «Լոկատոր» ընկերության տնօրեն Արման Խաչատրյանը։
Նա ավելացրեց, որ, ստեղծելով հակակարկտային նոր կայանը, նրանք հաշվի են առել երկրում գործող կայանների բոլոր թերությունները։
Նոր կայաններն աշխատում են ավտոնոմ ռեժիմով, և անսարքությունների դեպքում ազդանշան է ուղարկվում կառավարման գլխավոր կենտրոն։ Հակակարկտային մեկ կայանը պաշտպանում է 120 հա մակերեսով տարածք։-0-
