Հայաստանի պետբյուջեի եկամտային հատվածը 2026թ․–ին նախատեսվում է ավելացնել 8,9%–ով․ Փաշինյան
ԵՐԵՎԱՆ, 27 հոկտեմբերի․/ԱՌԿԱ/․ Հայաստանի 2026 թվականի պետական բյուջեի եկամուտների հատվածը նախատեսվում է ավելացնել 253.4 միլիարդ դրամով կամ 8.9%-ով, հայտարարեց վարչապետ Նիկոլ Փաշինյանը ԱԺ–ում 2026 թվականի բյուջեի նախագծի քննարկման ժամանակ։
Նրա խոսքով՝ հաջորդ տարվա ամենակարևոր նորությունը կլինի առողջության պարտադիր ապահովագրության համակարգի ներդրումը։ Միաժամանակ նա պարզաբանեց, որ այս հարցով հաջորդ տարի քաղաքացիների համար լրացուցիչ ֆինանսական բեռ չի ստեղծվի, քանի որ ադապտացիոն շրջանում բոլոր ծախսերը կհոգա կառավարությունը։
«Հետագայում կառավարությունը նախատեսում է առողջության ապահովագրություն ապահովել մինչև 18 տարեկան երեխաների, 65 տարեկանից բարձր թոշակառուների և որոշակի սոցիալական խմբերի համար», - ասաց նա՝ հավելելով, որ փոփոխություններ են նախատեսվում անապահովության գնահատման համակարգում։
Կառավարության ղեկավարը նաև հայտարարեց, որ 2026 թվականին 55 միլիարդ դրամ կհատկացվի Լեռնային Ղարաբաղից ներքին տեղահանված անձանց բնակարանային խնդիրների և այլ կարիքների լուծմանը։
ՀՀ կառավարությունը սեպտեմբերի 25–ին հաստատեց 2026 թվականի պետական բյուջեի նախագիծը։ Փաստաթղթում ՀՆԱ-ի աճն ամրագրված է 5.4%, եկամուտները՝ 3.9 տրիլիոն դրամ, ծախսերը՝ 3.6 տրիլիոն դրամ, իսկ պակասուրդը կկազմի 537 միլիարդ դրամ կամ ՀՆԱ-ի 4.5%-ը։ (1 դոլարը – 383.05 դրամ)
